Letër e hapur nga KDI: Në takimin e Berlinit të prezantohet shteti i Kosovës me një zë unik

Instituti Demokratik i Kosovës KDI, ju ka bërë thirrje përfaqësuesve më të lartë të shtetit, që në takimin e Samitit të Berlinit ta prezantojnë shtetin e Kosovës me një zë unik sa i përket procesit të dialogut Kosovë-Serbi dhe çështjeve që ndërlidhen me këtë proces.

Një qasje e koordinuar institucionale sipas KDI-së reflekton edhe vullnetin qytetar.

“Do të ndikonte direkt në forcimin e pozitës negociuese të Kosovës në raport me Serbinë, si dhe do të përçonte mesazh të qartë tek shtetet anëtare të Bashkimit Evropian se Kosova është duke trajtuar me përgjegjësi të gjitha obligimet ndërkombëtare”, thuhet në komunikatë.

KDI përmes letrës së hapur për  të hapur Presidentin Hashim Thaçi dhe Kryeministrin e Republikës së Kosovës Ramush Haradinaj ju ka rikujtuar se pjesëmarrja e tyre në takimin e Berlinit pa një qëndrim të dakorduar institucional mund të dëmtojë pozicionin e Republikës së Kosovës në raport me pjesëmarrësit e këtij takimi në veçanti, dhe në raport me marrëdhëniet ndërkombëtare në përgjithësi.

“Deklarimet e juaja publike gjatë muajve të fundit shpërfaqin dallime substanciale lidhur me fazën përfundimtare të dialogut dhe taksën 100% ndaj produkteve të Serbisë dhe Bosnje e Hercegovinës. Duke ju përcjellë shqetësimin tonë lidhur me mungesën e një pozicioni të dakorduar institucional për çështjet që do të diskutohen në këtë takim, ne vlerësojmë që Kosova rrezikon të paraqitet si shtet jo serioz dhe pa vizion të qartë për rrugëtimin e mëtutjeshëm drejt integrimit evropian, ku normalizimi i marrëdhënieve me Serbinë përbën një element kyç të këtij procesi”, thuhet në letër.

Samiti i Berlinit, sipas KDI-së, paraqet një nga iniciativat më të rëndësishme për promovimin e bashkëpunimit rajonal në mes të shteteve të Ballkanit Perëndimor, si dhe garantimin e stabilitetit në këtë rajon.

“Duke qenë se marrëdhëniet mes Kosovës dhe Serbisë janë në fokus të angazhimit të BE-së, zhvillimet e fundit rreth fazës përfundimtare të dialogut Kosovë-Serbi pashmangshëm do të jenë pjesë e diskutimit në këtë Samit. Duke konsideruar se normalizimi i marrëdhënieve Kosovë-Serbi shihet si çështja e fundit e hapur në Ballkanin Perëndimor, pas zgjidhjes së çështjes së emrit mes Maqedonisë së Veriut dhe Greqisë, në kuadër të sferës së politikës së jashtme të BE-së, në këtë Samit, Kosova dhe Serbia do të inkurajohen që të vazhdojnë dialogun për normalizimin e marrëdhënieve”, është thënë në njoftim.

Samiti i Berlinit parashihet të mbahet më 29 prill.

Kryeministri Ramush Haradinaj sot tha se shpreson që të mos ketë shpërputhje të qëndrimeve me Presidentin Hashim Thaçi në atë takim.

Haradinaj për takimin e Berlinit: Shpresojmë t’i harmonizojmë qëndrimet me Thaçin