Foto: Komuna e Ferizajt/Facebook

Kryetari i Ferizajt takon komandantin e ri të kampit ushtarak 'Bondsteel'

Kryetari i Ferizajt, Agim Aliu, ka pritur në takim komandantin e ri të kampit ushtarak “Bondsteel”, kolonelin Roy Macaraeg.

Në këtë takim u diskutua për gjendjen e përgjithshme të sigurisë në Ferizaj, angazhimet e organeve të sigurisë dhe autoriteteve lokale në garantimin e një ambienti të qetë dhe stabil për gjithë qytetarët si dhe intensifikimin e bashkëpunimit mes institucioneve gjegjëse.

Kryetari Aliu njoftoi ushtarakun amerikan me aktivitetet e institucionit të Komunës në fushën e sigurisë si dhe masat që janë ndërmarrë në këtë drejtim.

Po ashtu, edhe drejtori i Drejtorisë Rajonale të Policisë së Kosovës, Gazmend Hoxha e informoi ushtarakun e lartë amerikan me situatën e sigurisë në këtë rajon si dhe me punën e angazhimet e Policisë në përmbushjen e detyrave dhe obligimeve për krijimin e ambientit të qetë e të sigurt për të gjithë qytetarët në zonën e përgjegjësisë të Rajonit të Ferizajt dhe më gjerë.

Koloneli Macaraeg në karrierë diplomatike u diplomua në Universitetin e Havajit në Manoah, për të vazhduar në ngritje dhe shkollime të mëtutjeshme në master dhe më pas në Master të Strategjisë së Sigurisë Kombëtare në Kolegjin Kombëtar të Luftës, i cili është pjesë e Universitetit të Mbrojtjes Kombëtare të ShBA-së në Uashington.

Funksioni i tij i parë ushtarak ishte në bazën e Ushtrisë Amerikane të Spirhed në Kuvajt, pastaj shërbeu në Byronë e Gardës Kombëtare dhe gjithashtu punoi në Pentagon, ku pasi mori gradën e kolonelit, ai ishte një nga pesë sekretarët ushtarakë të Departamentit të Mbrojtjes të Shteteve të Bashkuara.

Koloneli Roy J. Macaraeg, komandën e bazës më të madhe ushtarake të KFOR-it në ‘Bondsteel’ e mori një muaj më parë, duke e zëvendësuar kolonelin tjetër Nick Ducich.