Tryeza në lidhje me epilepsinë | Fotyo: KALLXO.com

Kërkohet që Shteti të Sigurojë Barnat Kundër Epilepsisë

Gjatë shënimit të Ditës Ndërkombëtare të Epilepsisë në Prishtinë nga Instituti Kombëtar i Shëndetësisë Publike u konstatua që gjendja të prekurve me këtë sëmundje po u vështirësohet edhe nga arsyeja se shumë barna që e luftojnë epilepsinë nuk janë në listën esenciale.

Kryetarja e Shoqatës Kundër Epilepsisë Valbona Govori kërkoi që shumë më shumë barna kundër epilepsisë të hyjnë në listën esenciale.

“Ne duhet t’i mbledhim forcat të bashkëpunojmë me Ministrinë e Shëndetësisë ku duhet të insistojmë të rrisim numrin e medikamenteve për t’i futur në listën esenciale”, tha Valbona Govori.

Govori  gjithashtu kërkoi një legjislacion të duhur i cili garanton të drejtat e kësaj kategorie të të sëmurëve.

Edhe Nexhmedin Shala, drejtor i Klinikës së Neurologjisë tha se shteti duhet të kujdeset për furnizim me barna kundër epilepsisë.

“Numri i ilaçeve të subvencionuara nga shteti është shumë i vogël, ilaçet tjera kryesisht vijnë nga donatorët në sasi të vogla dhe me afate të kufizuara të përdorimit. Duhet të bëjmë zhurmë dhe të bëjmë presion që të rritet numri i ilaçeve që duhet të futen në listën esenciale”, tha Shala.

Adem Beka, babai i një të prekuri nga epilepsia që trajtohet në Klinikën e Neuropsikiatrisë tha se djalit të tij i tërë pensioni që e merr i shkon për barna.

“Ai e merr njëfarë pensioni që është me aftësi të kufizuara dhe me ato para ai i blen barnat e veta dhe tjetër ndihmë nuk ka”, tha Beka.

Diskutimi në Ditën Ndërkombëtare të Epilepsisë kishte për qëllim ngritjen e vetëdijes dhe përmirësimin e tretmanit dhe kujdesit për njerëzit me këtë sëmundje, por statistika zyrtare për të sëmurët me epilepsi nuk pati as për vitin 2016.

Edhe sivjet, sikurse vitin e kaluar u tha se ka diskriminim të të prekurve nga epilepsia.

http://kallxo.com/kunder-diskriminimit-te-pacienteve-me-epilepsi/

Redaktoi: Bekim Muhaxheri