Stacioni i autobusëve në Istog | Foto: KALLXO.com
Jepet për Lokale një Pjesë e Oborrit të Stacionit të Autobusëve
Për lokale hotelerie do shfrytëzohet në tre vjetët e ardhshëm një pjesë e oborrit të Stacionit të Autobusëve në Komunën e Istogut.
Kryeshefi i Stacionit të Autobusëve të Istogut, Mentor Vuthaj,tha për KALLXO.com se vendimi për dhënien me qira të një hapësire të caktuar të oborrit është marrë nga Bordi i Stacionit
“Vendimi Bordit të Stacionit të Autobusëve të Istogut ka qenë të jepet me qira. Procedurat kanë qenë përmes ofertimit , është hapur oferta, e kemi bërë kontratën, janë kushtet e kontratës operatori i cili duhet m’i zbatu”, tha Vuthaj për KALLXO.com .
Sipas tij, hapësira që do shfrytëzohet për lokal hotelerie nga operatori fitues “Delfinat” nuk ua pengon veprimtarinë kompanive që kanë autobusë dhe shfrytëzojnë stacionin.
Vuthaj tha së fituesi i ofertës duhet t’i respektojë rregulloret komunale gjatë veprimtarisë së tij në lokalin e hotelerisë.
“Hapësira e dhënë është pjesë që nuk i pengon operacionalizimit të stacionit, ajo pjesë ka qenë me therra. Operatori është i obliguar t’i zbatojë të gjitha rregulloret komunale. Mosrespektimi i rregulloreve është çështje e Inspektoratit të Komunës së Istogut”,tha kryeshefi i Stacionit të Autobusëve në Istog për KALLXO.com.
Kurse, Bedri Hasanaj, drejtor i Shërbimeve Publike në Komunën e Istogut, tha se lokali në oborrin e Stacionit të Autobusëve do punojë sikurse të gjitha lokale tjera në këtë komunë.
“Bordi i Stacionit të Autobusëve na ka njoftuar neve për këto procedura dhe ne nuk kemi kundërshtuar. Ai deri në 12 e ka të lejuar të punojë, njëjtë sikurse të gjitha lokalet tjera në Istog”, tha Hasanaj.
Ndonëse ende pa u hapur ky lokal, në KALLXO.com, një qytetar ka raportuar se në hapësirën e Stacionit të Autobusëve në Istog do të organizohen mbrëmje muzikore.
Një gjë të tillë e kanë mohuar zyrtarët komunalë dhe ata të stacionit të autobusëve në Istog.