Shefja e re e EULEX-it, Alexandra Papadopoulou
Ish-Shefja e Zyrës Greke Nis Drejtimin e EULEX-it
Zyra për Informim e EULEX-it bën me dije se Alexandra Papadopoulou ka marrë detyrën e drejtimit të misionit evropian në Kosovë.
Kjo zyrë në njoftimin e saj tregon se Papadopoulou edhe më parë shërbeu në Kosovë.
“Sot e mori detyrën si shefe e re e Misionit të Bashkimit Evropian për Sundimin e Ligjit në Kosovë (EULEX). Zj. Papadopoulou, një diplomate e lartë greke me përvojë të gjatë në Ballkan. Ka shërbyer edhe më parë në Kosovë si shefe e Zyrës Ndërlidhëse të Greqisë në vitin 2000,” thuhet në njoftimin e EULEX-it.
Sipas njoftimit, Papadopoulou në ditën e parë si shefe e EULEX-it u zotua për ndihmë autoriteteve kosovare për sundim të ligjit.
“Kam kënaqësinë të jem shefja e re e Misionit EULEX dhe të vazhdoj t’i ndihmoj autoritetet në ndërtimin e një sistemi të pavarur dhe efikas të drejtësisë këtu në Kosovë,” tha Papadopoulou.
Diplomatja greke ishte më parë përfaqësuese e përhershme e Greqisë në Bashkimin Evropian në Bruksel, si dhe drejtoreshë e përgjithshme për çështje të BE-së në Ministrinë e Punëve të Jashtme të Greqisë, kur ky shtet kryesoi Bashkimin Evropian në vitin 2014.
Papadopoulou punoi edhe si zëvendëspërfaqësuese e përhershme e Greqisë në OKB, ndërsa ishte edhe shefe e Zyrës Ndërlidhëse të Greqisë në Shkup për pesë vjet.
Në krye të EULEX-it Papadopoulou zëvendësoi diplomatin italian Gabriele Meucci.
Misionit Evropian për Sundimin e Ligjit sivjet iu vazhdua mandati deri në qershor të vitit 2018.
Kjo është hera e parë që Bashkimi Evropian emëron në krye të EULEX-it përfaqësues nga një shtet që ende nuk e ka njohur pavarësinë e Kosovës.