Imer Beka konfirmon arrestimin e Ismet Osmanit (Currit)

Është arrestuar pronari i disa bizneseve në Kosovë, Ismet Osmani i njohur me emrin “Curri”.

Arrestimin e “Currit” e ka konfirmuar për KALLXO.com edhe Kryeprokurori i Prokurorisë Themelore në Prishtinë, Imer Beka.

Ai u përgjigj shkurt në pyetjen e KALLXO.com për arrestimin e Ismet Osmanit.

“Po, por rastin e ka një prokuror nga ai mund të merrni detaje”, tha Kryeprokurori Beka.

Arrestimi i “Currit” është bërë në lagjen “Marigona”.

KALLXO.com ka kontaktuar edhe me Departamentin e Përgjithshëm të Policisë së Kosovës në lidhje me rastin.

Zëdhënësi i DPP-së, Baki Kelani ka thënë për KALLXO.com se është duke u zhvilluar një operacion policor.

“Mund të ju konfirmojmë se, Drejtoria për Hetimin e Krimeve Ekonomike dhe Korrupsionit pas një hetimi të gjatë është duke realizuar një operacion policor i cili përfshin disa lokacione”, tha Kelani për KALLXO.com.

Ai shtoi se pasi të përfundoj operacioni do të dalin me detaje të reja.