Haradinaj kërkon të rritet paga minimale në Kosovë

Kryeministri i Republikës së Kosovës, Ramush Haradinaj ka njoftuar se së shpejti do të filloj diskutimi për rritjen e pagës minimale në vend. Sipas tij, rritja e pagës minimale është e domosdoshme dhe ndikon në jetën e qytetarëve.

“Rritja e pagës minimale në vend është një nga veprimet e domosdoshme që ndikon drejtpërdrejt në mirëqenien e qytetarëve tanë. Sot, kam kërkuar nga Ministri i Punës dhe Mirëqenies Sociale Skender Reçica që menjëherë të riaktivizoj Këshillin Ekonomik Social, në mënyrë që të filloj diskutimi për pagën minimale në vend” njoftoi Haradinaj në rrjetin social “Facebook”.

Kreu i ekzekutivit kosovar tha se do të përkrah çdo rekomandim që del nga Këshilli Ekonomik Social, që është në kuadër të Ministrisë së Punës.

Haradinaj premtoi se në këtë proces do të merën në shqyrtim të gjitha palët e nevojshme.

“Unë si Kryeministër dhe Qeveria e vendit, përkrahim fuqishëm rekomandimin e Këshillit Ekonomik Social, për rritjen pagës minimale, e cila nuk ka pësuar rritje që nga viti 2011. Andaj, është shumë me rëndësi që edhe kjo pjesë e shoqërisë të përfitoj nga rritja ekonomike e vendit që ka ndodhur nga ky vit dhe ashtu siç kemi vendos rregull edhe në sektorin publik, përmes miratimit të Ligjit për Pagat.  Në këtë rrugëtim, do të merren në konsideratë dhe në shqyrtim të gjitha palët e nevojshme, në mënyrë që ky proces të finalizohet sa më parë”, shkroi ai.