FOTOGALERI - Erdhi Rita...

Ylli i muzikës pop, Rita Ora ka ardhur sërish në Kosovë.

Kësaj radhe jo për të mbajtur ndonjë koncert, por për një mision humanitar në vendlindjen e saj.

Këngëtarja tash e dy ditë po qëndron në Kosovë në kuadër të një bashkëpunimi me Fondin e Kombeve të Bashkuara për Fëmijë UNICEF.

Të mërkurën Ora bëri një paraqitje të shkurtër publike në ngjarjen vjetore të Zyrës së UNICEF-it në Kosovë “Activate Talks”, që u mbajt në Amfiteatrin e Bibliotekës së Universitetit të Prishtinës.

Këngëtarja shqiptare me famë ndërkombëtare, shtoi se gjatë këtyre dy ditëve sa po qëndron në Kosovë është njoftuar për së afërmi me familjet kosovare dhe të rinjtë e vendit.

“Jam që dy ditë në Kosovë, kemi bërë një rrugëtim të mrekullueshëm me UNICEF. Kam kaluar një kohë të mrekullueshme me rininë e Kosovës, kam mësuar shumë. Jam njoftuar për së afërmi me jetën e të rinjve dhe familjeve në Kosovë”, tha ajo.

Ora përsëriti se është e lumtur dhe krenare që është nga Kosova.

“Jam shumë e kënaqur me punën e ‘Up Shift’ të UNICEF-it që po bëhet këtu. Jam shumë e nderuar që jam këtu dhe që kam takuar kaq shumë heronj. Jam shumë krenare që jam nga këtu”, shtoi ajo.

Rita Ora është shpallur ambasadore e Republikës së Kosovës.

Këngëtarja para kësaj here, e vizitoi Kosovën me 17 shkurt 2018, në 10 vjetorin e pavarësisë, ku mbajti edhe një koncert madhështor në Prishtinë.