Fermerët e komunave të Kosovës do të marrin derivate 6 cent më lirë

Kompania e derivateve, HIB Petrol ka njoftuar se është në vazhdën e nënshkrimit të marrëveshjeve me komunat në nivel vendi, ku aktualisht janë arritur marrëveshje me shtatë komuna të Kosovës për shitjen e derivateve me çmim më të lirë për fermerët.

Sipas njoftimit, me marrëveshjen e re, HIB Petrol do të ofrojë çdo litër të derivateve për 6 cent më lirë sesa çmimi ditor në pikë për fermerët dhe pajisjet e tyre bujqësore, në mënyrë që ta nxisë prodhimin vendor duke i ulur kostot e prodhimit të produkteve kosovare.

“Komunat me të cilat aktualisht kemi arritur marrëveshje bashkëpunimi dhe te cilat do të përfitojnë nga çmimet më të lira të derivateve nga HIB Petrol përfshijnë Ferizajn, Gjilanin, Prizrenin, Podujevën, Fushë Kosovën, Mitrovicën dhe Pejën. HIB Petrol është duke vazhduar angazhimin e saj që listës së këtyre komunave t’i bashkëngjiten edhe tjerat, në mënyrë që sa më shumë fermerë të përfitojnë nga marrëveshjet të cilat ua mundësojnë ngasjen e pajisjeve dhe mjeteve bujqësore me çmim të zbritur”, bëhet e ditur në njoftim.

“Ndryshe nga viti i kaluar që ky çmim që ishte 5 cent më lirë sesa çmimi i tregut të derivateve në pikën furnizuese për bujqit dhe fermerët, këtë vit do të jetë 6 cent më lirë në litër. Për ta konkretizuar këtë bashkëpunim me dobi të jashtëzakonshme për xhepin e fermerëve dhe bujqve, janë nënshkruar marrëveshje të reja të bashkëpunimit mes HIB Petrol dhe Kryetarëve të Komunave të lartpërmendura”, ka thënë Fisnik Thaçi përfaqësues nga kompania “HIB Petrol”.

Një shërbim të tillë për fermerët është duke e ofruar edhe kompanie tjetër e derivateve të naftës, “SHELL”.

https://kallxo.com/nenshkruhet-marreveshja-qe-iu-mundeson-fermereve-cmim-me-te-lire-te-naftes/

.