Dosja: Kosovarët kontrabanduan shtetas nga Nepali
Qamil dhe Liridon Hyseni, të akuzuar për ndihmë në kryerjen e veprës penale kontrabandim me migrantë, e pranuan fajësinë.
Ndërsa tre të tjerë, Gophan Singh Khadaka, Eran Elshani dhe Milazim Selmani, u deklaruan të pafajshëm.
Pas 11 dështimesh për mbajtjen e seancës gjyqësorë, sot u arrit të mbahet seanca fillestare, ndaj të akuzuarve për kontrabandim me migrantë
Prokurori Ilaz Beqiri deklaroi se pajtohet me pranim e fajësisë nga ana e të pandehurve Qamil dhe Liridon Hyseni, duke i propozuar gjykatës që ta aprovojë një pranim të tillë dhe të merret si rrethanë lehtësuese, po ashtu të veçohet procedura ndaj tyre.
Trupi gjykues, gjykatësja Naime Krasniqi- Jashanica, e aprovoi pranimin e fajësisë, së dy të akuzuarve Qamil dhe Liridon Hyseni, dhe mori aktvendim qe ndaj tyre të veçohet procedura, si dhe njoftoi që shpallja e aktgjykimit për dy të akuzuarit që e pranuan fajësinë, do bëhet me 20 mars.
Më tutje seanca vazhdoi me tre të akuzuarit tjerë, Gophan Singh Khadaka, Eran Elshani dhe Milazim Selmani, të cilët u deklaruan të pafajshëm.
Mirëpo mbrojtja e të akuzuarit Gophan Singh Khadaka, avokatja Fllanza Avdiu, deklaroi se nga Prokuroria nuk ka pranuar transkripten e bisedimeve, dhe kërkoi nga ana e Prokurorisë që t’i sigurohen këto prova, ku sipas saj këto prova mbështesin faktet vendimtare të përshkruara në aktakuzë.
Prokurori Ilaz Beqiri e kundërshtoji kërkesën e mbrojtjes, duke thënë se Prokuroria nuk ka prova tjera e as trasnkripta, pos atyre që ka propozuar në aktakuzës.
“Sa i përket kërkesës së mbrojtëses për shpikjen e provave, te cilat nuk janë propozuar në aktakuzë, ato prova le ti siguron mbrojtja, ndërsa sa i përket prova te propozuara në aktakuzë mbrojta është furnizuar dhe ato janë CD e bisedimeve telefonike”, tha prokurori Beqiri.
Por trupit gjykues, mori aktvendim që Prokuroria t’ia sigurojë transkriptat mbrojtjes, si dhe të akuzuarit, Gophan Singh Khadaka, Eran Elshani dhe Milazim Selmani, i njoftoi se brenda afatit prej 30 ditësh, kanë të drejtë të bëjnë kërkesë për hedhje të aktakuzës.
Ndryshe gjykatësja, Naime Krasniqi – Jashanica, ka deklaruar se ndaj dy të akuzuarve Nikollë Bardheci dhe Besim Neziri, është veçuar proceduara, sepse sipas informatave të zyrtarëve policorë të njëjtit gjenden jashtë shtetit.
Sipas aktakuzës i akuzuari Gopal Singh Khadaka, akuzohet së në muajin maj të vitit 2012, në mënyrë të kundërligjshme ka sjellë në Kosovë disa shtetas nepalez, të cilët për një kohë i ka vendosur në hotel “Evropa” në Gjilan dhe nga aty i ka marrë tani i gjykuari Idriz Gashi dhe në mënyrë ilegale i ka dërguar në Serbi, me ndihmën e disa personave shtetas të Serbisë, ku Idriz Gashi, pasi i ka dërguar në Serbi personat e tillë, ju ka marrë pasaportat e tyre dhe të njëjtat i ka dorëzuar tek i pandehuri Gopal Singh Khadaka.
