Deputetët e Opozitës Dërgohen në Gjykatë
Deputetët e opozitës që u arrestuan dje, janë dërguar në Pallatin e Drejtësisë.
Edhe Pal Lekaj, deputeti i AAK-së u soll në gjykatë.
12:09
Naim Rudari, avokati i deputetes së “Vetëvendosjes” Besa Baftiu tha se klientja e tij gjatë marrjes në pyetje nga prokurori është mbrojtur në heshtje.
Policia i ka shoqëruar deputetët deri në gjykatë ku pritet t’u caktohet masa e sigurisë.
Faton Topallit që shkeli masën e arrestit shtëpiak duke u paraqitur në seancën e djeshme të Kuvendit i është caktuar paraburgimi.
Lajmin për KALLXO.com e bëri të ditur Alban Ajvazi, avokati i Topallit.
Avazi paralajmëroi se do të bëjë ankesë ndaj vendimit të Gjykatës Themelore në Prishtinë.
Arresti shtëpiak me paraburgim i është ndërruar edhe deputetit Ismajl Kurteshi që gjithashtu theu masën e arrestit shtëpiak duke mbajtur fjalim në tubimin e “Vetëvendosjes” të zhvilluar të shtunën në Gjilan dhe duke tentuar të marrë pjesë në seancën e Kuvendit.
Lajmin për paraburgimin e Kurteshit e konfirmoi avokatja e tij Teuta Zhinipotoku.
Edhe Zhinipotoku paralajmëroi ankesë ndaj këtij vendimi.