Dënimi 7 vjet burg i ashkaliut për grabitjen e 400 eurove, KGjK mbron gjykatën

Me anë të një reagimi zyrtar, Këshilli Gjyqësor i Kosovës i ka konsideruar si ndërhyrje direkte në sistemin e drejtësisë deklaratat e disa deputeteve lidhur më dënimin e një të riu të komunitetit ashkali.

Në reagimin e vet, KGjK tha se ky nuk është aktgjykimi i parë që për veprën penale të grabitjes nga neni 329 par.3 lidhur me par.1 është shqiptuar dënimi me burg prej 7 vjet, e që është “minimumi i dënimit të paraparë me ligj”.

Këshilli Gjyqësor thotë se deklarata të tilla paraqesin ndërhyrje direkte në sistemin gjyqësor, por edhe mosbesim në institucionet kushtetuese të vendit.

“Lusim të gjithë akterët politikë që të përmbahen nga deklaratat dhe veprimet e tilla tendencioze, dhe t’i lënë gjyqtarët të qetë në punën e tyre. Këshilli Gjyqësor i Kosovës qëndron fuqishëm pranë gjyqtarëve, duke i mbështetur në ushtrimin e funksioneve të tyre dhe duke i inkurajuar për përmbushjen e mandatit të tyre”, tha KGjK.

“Sistemi Gjyqësor i Kosovës, garanton gjykime të drejta, të paanshme dhe profesionale, për të gjithë qytetarët e Republikës së Kosovës, pavarësisht përkatësisë se tyre etnike, racore, a fetare dhe bindjeve politike”, tha ky Këshill.

Ky është një nga rastet e rralla që Këshilli Gjyqësor i Kosovës, reagon në mënyrë të tillë duke e publikuar edhe aktgjykimin me iniciale dhe me numër personal te personave të dënuar apo akuzuar.

18 vjeçari, Shenoll Tahiri u dënua me 7 vite burg, nga Gjykata Themelore në Prishtinë, pasi u gjet fajtor për grabitjen me armë në një pikë të “Moneygram” në Podujevë, në shtator të këtij viti.

Vendimi i tillë nuk ka kaluar pa u komentuar nga deputetet e kuvendit.

Deputetja e Vetëvendosjes Albulena Haxhiu pas këtij vendimi e ka kritikuar sistemin e drejtësisë i cili, sipas saj, të rinjtë po i dënon për 400 euro, ndërsa keqpërdoruesit e milionave po i liron.

“Me 7 vite burg, sistemi jonë i drejtësisë paska dënuar një 18 vjeçar të komunitetit ashkali për 450 euro pra ky sistemi i njëjtë që i liron dhe amniston zyrtarët e lartë dhe njerëzit e lidhur me ta, ani pse dyshohen për miliona keqpërdorime”, ka shkruar Haxhiu në Facebook.

Kurse deputeti i PSD-së, Frashër Krasniqi, e ka konsideruar si vendim racist, dënimin e të riut.

“450 euro – 7 vjet burg? Rast tipik i racizmit, të cilit nuk i shpëton shteti dhe shoqëria jonë, kur është fjala për romët, ashkalinjtë dhe egjiptasit. Padrejtësia diku, është kërcënim për drejtësinë, kudo”, ka thënë Krasniqi.

Por sa janë dënuar për vepra të ngjashme persona të tjerë në gjykatat e Kosovës?

Në janar të këtij viti, Gjykata Themelore në Mitrovicë, Behar Gecin, Labinot Gecin dhe Blerim Shatrin, i dënoi me nga 1 vit e gjashtë muaj burgim për grabitje me armë në një pikë të PTK-së në Skenderaj.

Ata akuzoheshin se si grup i armatosur dhe të maskuar me qëllim që vetes t’i sjellin dobi pasurore të kundërligjshme kanë hyrë në objektin e PTK-së, në Skënderaj dhe me kërcenim të armës kanë marrë kasafortën në të cilën ka pasur para të gatshme dhe pulla postare në shumë prej 1.250 euro.

Në Gjakovë, Jetmir Ukëhaxhaj dhe Lorik Beqiraj ishin dënuar me nga 2 vite burgim për vjedhje të rëndë.

Ata u dënuan nën akuzën se duke përdorur forcën kanë hapur dyert e punëtorisë dhe kanë marrë një veturë të tipit “Mercedes A-Klas”, e po ashtu nën kërcënim të armës kanë marrë pasurinë e një punëtori në “Petrol Company”.

E njëjta Gjykatë e kishte dënuar Leotrim Bajramin me dy vite burgim për grabitjen e taksistit.

Bajrami akuzohej se pasi kishte udhëtuar me taksi nga Prishtina në Gjakovë nuk ia kishte paguar shërbimet taksistit dhe nën kërcënimin e armës (armë e rreme) i kishin marrë atij 25 euro.

Në Prishtinë, për grabitje të bankës “Raiffaisen”, Adil Krasniqi ishte dënuar me katër vjet burg, ndërsa Sami Bajrami me tre vite.

Gjykata në Prishtinë, Besnik Tërrnavën e Fitim Rafunën, i kishte dënuar me nga 10 vite e 3 muaj burgim për grabitjen e 17 personave.

E njëjta gjykatë e kishte dënuar Arjan Delijën me 3 vite e 3 muaj burg. Ai akuzohej se kishte hyrë në një shtëpi ku po jetonte një grua e vetmuar dhe pasi që e kishte sulmuar atë duke i shkaktuar lëndime të lehta trupore, të njëjtës ia kishte grabitur një telefon.