Dekorata për Policët Specialë

Në vitin me shumë protesta dhe shumë punë për policinë, Drejtori i Policisë së Kosovës, Shpend Maxhuni, i ka dekoruar me medalje dhe mirënjohje pjesën më të madhe të udhëheqësve të njësive të specializuara.

Medalja më e lartë “Mburoja e Policisë” i ka takuar togerit të njësive speciale, Besart Ahmeti.

Togeri i njësive të specializuara u bë i njohur pas protestave të dhunshme të opozitës në janarin e këtij viti kur mori lëndime në sy.

Ahmeti u kthye në njësitë speciale vetëm pas një tretmani disajavor në Turqi.

Në fjalën e tij në ceremoninë e përvitshme të ndarjes së medaljeve kryepolici Shpend Maxhuni ka thënë se Policia e Kosovës është faktor në sigurinë e vendit dhe rajonit.

“Sot nuk ka vlerë më të madhe se sa të punosh për vendin dhe të ardhmen e tij, për të ardhmen e fëmijëve tanë dhe për këtë fakt vlerësoj se jemi me fat”, ka thënë Maxhuni.

Puna e policisë gjatë vitit 2015 e ka bërë të ndihet krenar edhe Ministrin e  Punëve të Brendshme, Skender Hysenin.

“Ne duhet të ndihemi krenarë si shtet, jemi të bekuar që kemi një polici të trajnuar mirë dhe profesionale. Nuk do të lejojmë që individë e raste te izoluara të prishin imazhin e Policisë së Kosovës”, ka deklaruar Hyseni.

Në fjalën e tij para eprorëve e policëve, Hyseni nuk ka dhënë ndonjë premtim konkret për përmirësimin e kushteve të punës në policisë përfshirë sigurimin jetësor e atë shëndetësor.

Të drejtat në punë të policëve i ka përmendur në fund të fjalimit të tij i pari i policisë, Shpend Maxhuni  ‘

“Një theks të veçantë duhet t’i kushtojmë mbështetjes dhe përkrahjes që vazhdimisht kemi nga qeveria e vendit. Këtë vit arritëm që të kemi edhe draft ligjin për pensionimin e zyrtarëve policorë dhe për këtë fakt më duhet të falënderoj personalisht ministrin Hyseni”, ka deklaruar Maxhuni.

Gjatë vitit 2015, Policia e Kosovës u përball me sfida të mëdha përfshirë menaxhimin e një varg protestash të dhunshme. Megjithë këtë raportet e policisë për këtë vit tregojnë për një rënie prej 11.57% të veprave penale në përgjithësi.