Avokati: Sadri Ramabaja Kishte Informacione se Jeta e Tij Është në Rrezik

Avokati Ramiz Krasniqi tha se klienti i tij Sadri Ramabaja ka dashur të largohej nga Kosova meqë kishte informacione se jeta e tij gjendet në rrezik.

Sipas avokatit Krasniqi, këtë informacion Ramabaja ka thënë ta ketë marrë nga një pjesëtar i Policisë së Kosovës.

Sadri Ramabaja doli sot para gjykatësit të procedurës paraprake në Prishtinë ku prokurori kërkoi që atij t’i caktohet masa e paraburgimit.

Ai është arrestuar gjatë fundjavës në portin e Durrësit në përpjeklje për t’u larguar drejt vendeve perëndimore disa ditë para se të paraqitej në prokurori për intervistim në prokurori si i dyshuar për përgatitje të veprave terroriste.

Në rrjetin social, Sadri Ramabaja kishte treguar se më 25 shtator ka marrë ftesë për t’u paraqitur në Prokurorinë Speciale të Kosovës në cilësinë e të pandehurit dhe të dyshuarit për kryerjeve e dy veprave penale: Vrasje të përfaqësuesve të lartë të Republikës së Kosovës dhe Përgatitje të veprave terroriste ose veprave penale kundër rendit kushtetues dhe sigurisë së Republikës së Kosovës.

Në të njëjtin postim, Ramabaja thekson se ftesa për t’u paraqitur në prokurori e ka kthyer plot 37 vjet prapa, kur ishte arrestuar nga UDB-ja në Gjilan.

Sipas thirrjes së Prokurorisë, të cilën e ka bërë publike vetë ai, Ramabaja duhet të paraqitet për intervistë më 9 tetor.

Sipas Ramabajës, deri më tani, nga Prokuroria Speciale për këtë motiv janë marrë në pyetje si të dyshuar: Xhevat Bislimi (kryetar i Shoqërisë LËVIZJA), Gafurr Elshani (avokat), Emrush Xhemaili (është thirrë permes telefonit, e natyrisht nuk i është përgjegjur thirrjes dhe pritet arrestimi I tij).

“Në këtë listë, si të dyshuar janë potencuar emrat e: Muhamet Kelmendit (profesor univerasitar, ish nënkryetari i LPK) dhe Ibrahim Kelmendi (njëri nga tre themeluesit e LPK-së – i vetmi i mbetur gjallë e në jetë, ish anëtar i Kryesisë së fundit të LPK,)”, ka shtuar Ramabaja.

Për të njëjtat vepra të dyshuara muaj më parë është arrestuar edhe një zyrtar tjetër i LPK-së, parti të cilës i ka takuar edhe Sadri Ramabaja.

Murat Jashari ishte arrestuar pas atentatit ndaj avokatit dhe ish-zyrtarit të lartë komunist, Azem Vllasit.

Vllasi kishte mbetur i plagosur me armë zjarri në sulmin që ishte kryer në banesën e tij në Prishtinë.