Ish-ministri i Qeverisë së Kosovës, Aleksandar Jabllanoviq
Arrestohet ish-Ministri Aleksandar Jabllanoviq
Jabllanoviq është arrestuar pasi që ishte i përfshirë në një zënkë.
Lajmin per KALLXO.com e ka konfirmuar zëvendësdrejtori i Policisë për Veriun e Mitrovicës Besim Hoti.
“Policia e stacionit të Leposaviqit e ka shoqëruar në polici Aleksandar Jabllanoviqin, i cili në afërsi të një pompe derivatesh në afërsi të Leposaviqit është përfshirë në një zënkë me disa persona të tjerë. Ai vazhdon të mbetet në polici deri në vendimin e prokurorit dhe sqarimin e rrethanave të ngjarjes”, tha Hoti për KALLXO.com.
Hoti ka shtuar se një femër, që dyshohet se është gruaja e Jabllanoviqit, nga brezi i këtij të fundit e ka hequr armën dhe ua ka drejtuar personave të tjerë në shenjë vetëmbrojtjeje.
Aleksandar Jabllanoviq ka qenë ministër për Komunitete dhe Kthim në Qeverinë e Kosovës.
Ai është shkarkuar në fillim të shkurtit 2015 nga kryeministri Isa Mustafa pas protestave të dhunshme të qytetarëve të organizuara pas ofendimeve që kishte bërë Jabllanoviq ndaj nënave gjakovare, të cilat i kishte quajtur “egërsira” pas protestave të tyre kundër ardhjes në Gjakovë të një grupi serbësh, për të cilët ato dyshonin se kishin marrë pjesë në krimet kundër ish-fqinjve të tyre gjatë kohës së luftës.