Anton Berisha i ankohet Haradinajt, Behgjet Pacolli po e favorizon bashkëpartiaken

Zëvendësministri në Ministrinë e Punëve të Jashtme, Anton Berisha i është ankuar kryeministrit Haradinaj se ministri i Punëve të Jashtme, Behgjet Pacolli i ka ndarë punët ndërmjet zëvendësministrave në mënyrë joproporcionale dhe favorizuese.

Berisha ka raportuar se Pacolli e kishte injoruar gatishmërinë e tij për të marrë përgjegjësi rreth misioneve diplomatike, duke i ndarë më shumë përgjegjësi zv.ministres, Rejhan Vuniqi që vjen nga AKR-ja.

Zëvendësministri Berisha, në raportin 100 ditor të punës së tij dorëzuar kryeministrit, të cilin e ka siguruar KALLXO.com, ka thënë se i ka prezantuar ministrit Pacolli pikëpamjet e tij për politikën e jashtme dhe ka kërkuar që të angazhohet në misione diplomatike pasi ai ishte i vetmi nga zëvendësministrat që kishte përvojë në këtë aspekt.

“Ministri Pacolli më 16 nëntor 2017, ka dërguar një shkresë në adresë të zv.ministrave, në të cilën ka kërkuar që agjenda e takimeve të zv.ministrave paraprakisht të aprovohet nga ai, që paraprakisht nënkuptonte, në rastin konkret timin, të mos takoj ambasadorë dhe diplomatë pa aprovimin e tij”, ka shkruar Berisha në raportin e tij.

Sipas Berishës kjo kërkesë ka qenë pengesë për kryerjen normale të takimeve dhe kontakteve dhe ka ulur intensitetin e bashkëpunimit me ambasadat.

“Për hir të klimës së mirë, unë jam i përshtatur kësaj kërkese, me gjithë faktin se unë në mungesë të detyrave të deleguara nga ministri, reduktimin e aktiviteteve në iniciativë e kam konsideruar jo ndihmues”, ka thënë Berisha.

KËTU mund të lexoni raportin e plotë të zëvendësministrit Anton Berisha.

KALLXO.com do të publikojë raportet e punës së zëvendësministrave.

Raporti i radhës do të jetë për zëvendësministren Rejhan Vuniqi.

Shkrime të tjera nga dosja e zëvendësministrave:

Zëvendësministri: Kam qenë prezent në konferencën e kryeministrit Haradinaj

Zëvendësministri ndihet komod me karrigen

Zëvendësministri e raporton punë takimin me Ministrin

Zëvendësministri e llogaritë punë pjesmarrjen në tryeza e konferenca

Zëvendësministri: Kam përfaqësuar ministrinë në përurime

Zëvendësministri i dërgon kryeministrit ‘raport shkencor’ për ndotjen

Zëvendësministri i raporton Haradinajt: Kontaktova me Coca Cola HBC

Telashet e zëvendësministrit: Mungesa e numrave të telefonave