Philipp Kosnett, Ambasadori i ShBA-së në Kosovë
Ambasadori amerikan: Mos i shfrytëzoni viktimat për përfitime politike
Ambasadori i Shteteve të Bashkuara në Kosovë, Philip Kosnett, tha se të mbijetuarit e mizorive “duhet të trajtohen me respekt, dinjitet dhe ndjeshmëri”.
Në një postim në Twitter, ai tha se “udhëheqësit e Kosovës duhet të ndihmojnë viktimat të shërohen, e jo t’i shfrytëzojnë ato për përfitime politike”.
Komentet e tij vijnë një ditë pasi deputetja e Kuvendit të Kosovës, Flora Brovina, publikoi një fotografi, të cilën fillimisht e prezantoi si dëshmi e akteve të përdhunimeve seksuale gjatë luftës në Kosovë.
Mediat vendore në Kosovë publikuan më pas pamjen e njëjtë, duke thënë se është marrë nga faqet e internetit me përmbajtje pornografike.
Të premten, Brovina kërkoi falje dhe pranoi se fotografia mund të jetë e falsifikuar.
Prokuroria Speciale e Republikës së Kosovës njoftoi se e ka ftuar Brovinën të ofrojë dëshmitë që ka dhe se do të hapë hetime mbi fotografinë e publikuar.
Atrocity survivors should be treated with respect, dignity, and sensitivity. #Kosovo’s leaders should be helping victims heal, not exploiting them for political gain. Read my remarks given at the recent Jahjaga Foundation Conference: https://t.co/ztIjB2gYca
— Ambassador Philip S. Kosnett (@USAmbKosovo) May 17, 2019