Eksperti amerikan përshkuan implikimin e shefit të AKI-së në deportimin e turqve

Raporti Ekskluziv i siguruar nga KALLXO.com për dëbimin e shtetasve turq nga Kosova i hartuar nga eksperti amerikan i angazhuar nga Komisioni Hetimor i Kuvendit, ka nënvizuar përfshirjen e ish-drejtorit të AKI-së, Driton Gashi, në këtë aksion.

Gashi ishte shkarkuar nga pozita e shefit të AKI-së pak ditë pas ngjarjes për t’u strehuar më pas në kabinetin e presidentit Hashim Thaçi ku edhe sot punon.

Sipas raportit, pas 17 ditë planifikimi të operacionit, gjashtë shtetasit turk të dëbuar nga Kosova janë dorëzuar tek autoritetet turke në prani të ish shefit të AKI-së, Driton Gashi.

Në dokumentin e siguruar nga KALLXO.com thuhet se në orën 10:09 ka përfunduar kontrolli i shtetasve turk në zonën VIP të Aeroportit Ndërkombëtar të Prishtinës “Adem Jashari”.

“Në këtë kohë prezent ishin shefi i njësisë së emigracionit, zyrtarët e DMH-së (Drejtoria për Migrim dhe të Huaj) dhe Drejtori dhe zyrtarët nga AKI,” thuhet në rrjedhën e ngjarjeve të raportit të parë nga KALLXO.com.

Sipas këtij raporti, në orën 10:25 ka filluar transportimi i shtetasve turk nga policia deri tek aeroplani i autoriteteve turke, ndërsa në orën 19:42 ka përfunduar dorëzimi, kurse në orën 10: 50 aeroplani është nisur në Turqi.

KALLXO.com ka tentuar të kontaktojë me Drion Gashin por kontakti me të ka qenë i pamundur.

07/03/2019

Agjencia Kosovare për Inteligjencë, AKI, “pushtoi ” zyrën e Policisë së Kosovës dhe udhëhoqi operacionin e dëbimit e gjashtë shtetasve turk të njohur si ‘gylenistët’ në mars të vitit të kaluar, duke komunikuar direkt me policët përmes telefonit.

KALLXO.com ka siguruar dosjen e një eksperti amerikan i cili ishte angazhuar nga Komisioni Parlamentar për të sqaruar rrethanat e deportimit të 6 shtetasve turq.

Raporti i cili do të publikohet në disa vazhdime tregon për shkelje të mëdha dhe ndërhyrje të AKI-së në punët e policisë dhe MPB-së.

Komisioni hetues Parlamentar i krijuar për të hetuar deportimin gjashtë shtetasve turq të njohur si ‘gylenistë’ në Turqi në mars 2018, pohon se AKI ka bërë shkelje të rëndë dhe duhet të marrë përgjegjësinë për operacionin.

Gjatë një interviste për BIRN, nënkryetari i këtij komisioni parlamentar, Driton Selmanaj nga LDK në opozitë, tha se AKI “pushtoi” zyrën e kolonelit të policisë Rrahman Sylejmani, i cili duhej ta menaxhonte këtë operacion.

“AKI ka marrë autorizime policore … AKI hyri në zyrat e policisë dhe ka menaxhuar plotësisht operacionin që me ligj janë ndaluar plotësisht”, tha Selmanaj.

Ai shtoi se AKI mund të ofrojë informata për policinë “dhe këtu përfundon çdo gjë”, duke shtuar se është policia që ka të drejtë të autorizojë.

“Ajo që ndodhi këtu është se dy agjentë të AKI-së hynë në zyrat e policisë, morën listën e punonjësve të policisë që punonin jashtë gjatë kësaj ndryshimi, morën numrat e tyre të telefonit dhe këta oficerë të policisë nuk komunikonin me komandantët e tyre, por me agjentët e AKI-së”, tha Selmanaj .

Selmanaj poashtu tha se i gjithë operacioni i policisë u drejtua nga këta dy agjentë.

“Kjo është një skandal, sepse tregon se si shërbimi sekret ka kapur institucione të tjera,” shtoi ai.

Selmanaj pohon se kjo është pranuar nga vetë koloneli i policisë, Rrahman Sylejmani dhe zyrtarët e përfshirë në këtë rast.

“Asgjë nuk ishte në duart e mia”, thotë Selmanaj Sylejmani gjatë intervistës me anëtarët e komisionit.

Këto shkelje të cilat i ka përmendur Selmanaj i ka evidentuar edhe raporti i shkruar nga eksperti amerikan Tiemni Ma, i cili është i angazhuar si ekspert i jashtëm te Avokati i Popullit i Kosovës.

Në raport të cilin e ka siguruar BIRN thuhet se një ditë para se të kryhej operacioni i dëbimit, më 28 mars u mbajt një takim midis Valon Krasniqit, drejtorit në Departamentin e Shtetësisë, Azilit dhe Migracionit të Ministrisë së Punëve të Brendshme, Shaban Guda, Kolonel dhe Drejtor i Policia Kufitare, Rrahman Sylejmani, drejtor në Drejtorinë e Migracionit dhe të Huajve të Policisë Kufitare dhe dy zyrtarë të AKI-së.

Sipas raportit, ky takim ishte hera e parë kur Policia u informua për revokimin e lejeve të qëndrimit të pesë shtetasve turq që kishin leje të vlefshme.

Gjatë takimit zyrtarët e AKI-së raportuan se kishin “përfunduar tashmë aranzhimet e transportit ajror”.

Kur Guda u pyet nëse Policia ishte e përfshirë në sigurimin e biletave të aeroplanëve midis gjërave të tjera, ai u përgjigj “nuk e bëmë këtë sepse Agjencia e Inteligjencës e Kosovës bëri të gjitha masat për ta”.

Në raste të tjera, thekson raporti, është Ministria e Punëve të Brendshme që kujdeset për të gjithë logjistikën.

Koloneli Sylejmani citohet gjithashtu për ta konfirmuar këtë.

“Ai [oficeri i AKI] tha se … transportin, biletat, gjithçka … ju nuk keni arsye të përfshiheni në atë sepse ne e trajtojmë atë, Zotëri Inteligjencës,” citohet Sylejmani.

Dy oficerë policie u caktuan të udhëheqin dy ekipe që do të kryejnë operacionin: Rreshter Ibrahim Mustafa dhe Toger Hamit Rukiqi i cili kishte një takim përfundimtar paraprakisht në orën 6:30 të mëngjesit më 29 mars.

“[Në këtë takim] z. Sylejmani i udhëzoi udhëheqësit e ekipit të shkëmbejnë numrat e telefonit me zyrtarët e AKI”, thuhet në raport.

Ai citon Mustafën duke konfirmuar se “kam komunikuar kryesisht me këtë oficer të AKI-t … Si çështje të vërtetë, ai më thirri çdo dy ose tre minuta”.

Kryetari i komisionit parlamentar Xhelal Sveçla tha për BIRN se ky rast është shkelja më e madhe e sovranitetit të Kosovës.

“AKI nuk është një institucion që kryen operacione … Në këtë rast ata kanë organizuar dhe koordinuar operacionin, si dhe transferimin në duart e shërbimit sekret turk,” tha Sveçla.

Një tjetër çështje e diskutueshme sipas Sveçla dhe Selmanaj është fakti se Shpend Maxhuni, atëherë kreu i Policisë së Kosovës tha se nuk kishte ndonjë informacion deri sa qytetarët turq të dërgohen në Turqi.

“Në të vërtetë, Driton Gashi i cili më pas ishte kreu i AKI-së, na tha se ai e njoftoi drejtorin e policisë [Shpend Maxhuni] tri ditë përpara. Tani, njëri prej tyre gënjen, “tha Selmanaj.

Në mes të një situate të ‘mjegulluar’ ku asnjë nga zyrtarët e shtetit nuk mori përgjegjësinë për dhënien e urdhrit për një operacion të tillë, drejtori e AKI-së, ai i  Policisë së Kosovës, si dhe ministri i Punëve të Brendshme, Flamur Sefaj u shkarkuan.

Megjithatë, nuk shkoi shumë kohë të dy drejtorët u ‘shpërblyen’ Driton Gashi u emërua sekretar në Presidencën e Kosovës, ndërsa Shpend Maxhuni u emërua kreu i Agjencisë Kosovare të Inteligjencës.

Gjashtë turqit të deportuar marsin e kaluar kërkoheshin nga Ankaraja për dyshimin se kanë lidhje me lëvizjen e klerikut në mërgim Fethullah Gulen, të cilin Turqia e quan “Organizata Terroriste Fethullahiste” ose FETO dhe fajëson për një grusht shteti të dështuar në vitin 2016.

Dita kur operacioni është kryer, Kryeministri i Kosovës Ramush Haradinaj tha se shtetasit turq të arrestuar në Kosovë të enjten ishin deportuar në Turqi pa dijeninë e tij.

“Sot, në operacionin e Agjencisë Kosovare të Inteligjencës, 6 qytetarë turq janë deportuar. Mua, si Kryeministër, nuk ishte i informuar për këtë veprim, prandaj do të veproj sipas kompetencave ligjore dhe kushtetuese, “shkroi ai në Facebook.