2 Milionë e 400 Mijë Euro për RTK-në

Para se të rekomandonte ndarjen e 2 milionë e 400 mijë eurove televizionit publik për periudhën prill-qershor, Komisioni për Buxhet e Financa aprovoi pa shumë kritika raportin e tremujorit të parë financiar të RTK-së.

Sipas këtij raporti për muajt janar-mars të këtij viti RTK-ja shpenzoi 2 milionë e 948 mijë  e 702 euro, ndërsa i kishte 2 milionë e 400 mijë euro mjete të ndara nga buxheti.

Drejtori i Bordit të RTK-së Ismet Behxheti  tha se RTK-në në këtë tremujor e kanë përcjellë vështirësi të ndryshme financiare, pasi sipas tij programi në RTK 2 është shtuar 10 për qind.

Ndërsa në lidhje me buxhetin e ndarë kritika pati deputetja Labinotë Demi – Murtezi. Ajo kritikoi RTK-në për mostransmetimin e fitores së Majlinda Kelmendit në garat e fundit në Francë.

“Pse nuk janë transmetuar garat e Majlinda Kelmendit që i ka pasur jashtë vendit, të gjithë qytetarët është dashur që fitoret e saj t’i kërkojnë në Youtube,” tha deputetja Demi –Murtezi.

Ajo kritikoi edhe shumë emisione që transmetohen në RTK e që janë të punuar nga jashtë.

Për mostransmetimin e garave të Kelmendit dhe emisionet e punuara nga jashtë, Bexheti u arsyetua me teknologjinë e vjetër të RTK-së.

“RTK është duke u përballur jo për fajin që po e përmendim punën e financave, por për shkak të teknologjisë tejet të vjetër kemi mungesë teknologjike, mungesë te kamerave, ku na ndodhin raste të tilla që ne me keqardhje e kemi humbur ku është edhe një hije pak e zezë për RTK-në, sepse ne e kemi obligim qe ti promovojmë rastet e tilla,” tha Behxheti.

Për shkak të vjetërsisë së pajisjeve të RTK-së Bexheti tha se ky televizion nuk po mund të marrë as pamje nga të gjitha viset e Kosovës.

Nëpër komisionet e Kuvendit është duke u diskutuar për mënyrën e financimit të RTK-së, por ende nuk është caktuar nëse RTK-ja do të financohet nga buxheti, apo nga parapagimi.

http://kallxo.com/propozime-te-ndryshme-per-financimin-e-rtk-se/