Mjeket italiane kujtojnë natën që nxiti izolimin e parë në Evropë

Një vit më parë, Laura Ricevuti dhe Annalisa Malara, të dyja mjeke në spitalin në Codogno të Italisë, kanë vërejtur se diçka ndryshe po ndodhte me një pacient në kujdesin intensiv.

Vendimi i tyre për të trajtuar këtë rast ka rezultuar me emergjencë kombëtare, pasi ato kanë identifikuar rastin e parë me koronavirus në këtë zonë, çka më vonë ka nxitur izolimin e parë në Evropë, raporton Reuters.

Një 38-vjeçar i shëndetshëm, i njohur si Mattia, emri i tij i parë, apo “pacienti një”, ka shkuar atëbotë në spital me temperaturë të lartë, koll dhe probleme me frymëmarrje.

Më 18 shkurt të vitit 2020 ai kishte refuzuar që të shtrihej në spital, andaj vetëm kishte marrë antibiotikë dhe kishte shkuar në shtëpi.

Më vonë gjatë ditës ai është kthyer në gjendje më të rëndë dhe ka nisur terapinë me oksigjen.

Dy ditë më vonë, gruaja e Mattias u ka treguar mjekeve se disa javë më parë ai ka qenë në darkë me disa kolegë që kanë qenë në Kinë.

Mirëpo Mattia nuk ka përmbushur kriterin për testim të detyrueshëm për koronavirus, sepse nuk ka qenë personalisht në Kinë.

“Unë është dashur të sqaroj disa herë pse kërkoja që të bëhej testimi për koronavirus”, ka thënë Malara, 39 vjeçare.

“Mjekja Malara dhe unë kemi vendosur të thyejmë protokollin”, kujton Ricevuti.

Ato kanë kryer testin dhe kanë dërguar mostrat në Milano.

Në orën 21:30 është dëgjuar zhurma e telefonit. Testi ka qenë pozitiv.

Që atëherë 95,000 persona kanë vdekur në Itali nga sëmundja COVID-19, që shkakton koronavirusi, njëherësh shifra më e lartë në Evropë pas Britanisë dhe e shtata në listën botërore. //REL