Kombinimi i ri i barnave ofron zbulim të madh për kancerin ovarian
Mijëra gra me kancer ovarian mund të përfitojnë nga një kombinim revolucionar i barnave pasi u dëshmua se i zvogëlon ndjeshëm tumoret në pothuajse gjysmën e pacientëve me këtë sëmundje.
Trajtimi i ri e bllokon rritjen e tumorit, duke ndihmuar në mbajtjen e sëmundjes për vite me rradhë. Ekspertët thonë se rezultatet “fantastike” dhe “shumë emocionuese” nga provat klinike të kombinimit të ilaçeve, të paraqitura në konferencën më të madhe në botë për kancerin këtë fundjavë, treguan se ishte “shumë më efektiv” sesa çdo opsion i disponueshëm për pacientët.
Një paciente që përfitoi nga ky kombinim tregoi se si mjekët e kishin paralajmëruar se nuk mund të bënin asgjë pasi kanceri i saj ovarian i rezistoi kimioterapisë dhe terapisë hormonale.
Mirëpo trajtimi zbulues tani e ka ndihmuar atë ta mposht sëmundjen për herë të dytë. Tumoret e saj janë zhdukur, ndërsa rezultatet e fundit të skanimit nuk tregojnë asnjë dëshmi të sëmundjes.
Prova e fazës 2, e udhëhequr nga Royal Marsden NHS Foundation Trust dhe Instituti i Kërkimeve të Kancerit, Londër, testoi ilaçin avutometinib vetëm dhe në kombinim me defactinib në 29 pacientë.
Rezultatet e provës tregojnë se pothuajse gjysma e pacientëve në kombinimin e ri të ilaçeve – 45% – panë që tumoret e tyre janë tkurrur ndjeshëm. Ai doli të ishte pothuajse dy herë më efektiv se trajtimi tjetër më i mirë – trametinib, i cili ka një shkallë reagimi prej 26%.
Rezultatet ishin edhe më të mira në pacientët me një mutacion të veçantë, me 60% që kishin tumore vezore të drejtuara nga KRAS, me një tkurrje të madhe pas trajtimit.
Megjithatë, gati një e treta – 29% – e pacientëve pa mutacion kishin gjithashtu një përgjigje inkurajuese, e cila është gjithashtu një përmirësim në trajtimin standard.
Të gjithë pacientët kishin kancer seroz ovarian të shkallës së ulët, i cili ka tendencë t’i prekë gratë më të reja.
Dr. Susana Banerjee, hetuesja kryesore globale e studimit të paraqitur në takimin vjetor të Shoqatës Amerikane të Onkologjisë Klinike në Çikago, thotë se mund ta përfaqësojë një “përparim të rëndësishëm”.
“Këto rezultate fillestare mund të jenë një lajm fantastik për gratë me kancer seroz ovarian të shkallës së ulët, duke treguar një opsion shumë më efektiv sesa trajtimet aktuale”, thotë ajo.
Banerjee, një onkologe mjekësore konsulente në Royal Marsden dhe udhëheqëse e ekipit për kancerin e grave në Institutin e Kërkimit të Kancerit, shtoi se “është e mrekullueshme të shohësh kaq shumë pacientë të përjetojnë një përgjigje kuptimplotë ndaj këtij kombinimi inovativ të barnave dhe unë jam shumë mirënjohëse për të gjithë ata që u bën pjesë e kësaj prove, duke e bërë të mundur këtë hulumtim”.
Avutometinib është një frenues i dyfishtë RAF dhe MEK, një lloj ilaçi i synuar që bllokon disa proteina që ndihmojnë në kontrollin e rritjes dhe mbijetesës së kancerit. Studimet kanë treguar se ilaçi mund të bëhet i paefektshëm me kalimin e kohës pasi tumoret zhvillojnë rezistencë ndaj trajtimit.
Megjithatë, kur kombinohet me defactinib – i cili e lufton një proteinë që inkurajon rezistencën ndaj ilaçeve – avutometinib funksionon në mënyrë më efikase. Kombinimi i barnave është mbi katër herë më efektiv sesa vetëm avutometinib.
Bashkautorja e studimit, Dr. Kathleen Moore, e Qendrës së Kancerit Stephenson në Oklahoma, thotë se rezultatet e trajtimit të ri janë “shumë emocionuese”. “Bukuria e kombinimit është se jeni duke i mposhtur dy mënyra që këto tumore të bëhen rezistente”, thotë ajo. “Kjo shkallë e reagimit është më e mira e raportuar për çdo ilaç në LGSOC. Kjo është një fushë me nevojë të lartë të paplotësuar që meriton shumë vëmendje”.
Ndërkohë që të dhënat e mbijetesës nuk janë ende të disponueshme nga studimi i ri i paraqitur në Çikago, studimet e mëparshme tregojnë se pacientët jetojnë mesatarisht 23 muaj pas trajtimit me këtë kombinim të barnave përpara se kanceri i tyre të përparojë.
“Kanceri seroz ovarian i shkallës së ulët nuk i përgjigjet mirë trajtimeve të miratuara aktualisht, kështu që këto rezultate mund të përfaqësojnë një përparim të rëndësishëm”, thotë Banerjee. Ajo shton se ishte “shpresuese” që rezultatet do të çonin që kombinimi i ilaçeve të bëhej “një standard i kujdesit për gratë”. Fillimisht e diagnostikuar me kancer seroz ovarian të shkallës së ulët në vitin 2009, Christine Cull, 71 vjeçare, u tmerrua kur zbuloi se sëmundja i ishte kthyer në vitin 2014. Ajo u trajtua me kimioterapi dhe terapi hormonale, të cilat nuk funksionuan, së bashku me disa operacione.
“Pika ime më e ulët gjatë gjithë kësaj përvoje ishte në vitin 2019 kur spitali im lokal tha se nuk kishte asgjë më shumë që mund të bënin për mua – ishte e tmerrshme”, thotë ajo. “Kanceri im i kishte rezistuar plotësisht kimioterapisë dhe terapisë hormonale, dhe ekipi im nuk ishte në gjendje ta operonte përsëri”.
“Fatmirësisht, doktori im më referoi në Royal Marsden, i cili, si qendër e specializuar për kancerin, kishte ekspertizën për të bërë një operacion tjetër. Kur sëmundja filloi të rritej përsëri vitin e ardhshëm, kjo provë u hap në spital dhe unë isha e kënaqur që mund të bashkohesha”. Cull është trajtuar me kombinimin e ri të barnave që nga viti 2020.
“Unë bëj skanime çdo tre muaj dhe çdo herë kemi parë që kanceri po bëhet gjithnjë e më i vogël. Pasi zbulova kohët e fundit se kanceri aktualisht nuk është as i dukshëm në skanime, u ndjeva e lehtësuar, e mahnitur dhe kaq e lumtur që mund t’ia transmetoja këtë lajm të mirë familjes dhe miqve.
Cull, nga Coventry, thotë se zbulimi i kishte dhënë asaj dhe familjes së saj shpresë kur kishte menduar se të gjitha opsionet e saj ishin ezauruar. “Për shkak të këaj prove, unë jam në gjendje të jetoj jetën time me burrin tim, tre fëmijët dhe tre nipërit e mbesat – me pothuajse asnjë efekt anësor”, thotë ajo./The Guardian
Përgatiti: Nuhi Shala
