Infeksioni më i gjatë me Covid-19 zgjati më shumë se 16 muaj

Mjekët në Mbretërinë e Bashkuar besojnë se kanë dokumentuar infeksionin më të gjatë Covid-19 – një pacient të cilin e trajtuan dhe  i cili kishte nivele të zbulueshme të virusit për më shumë se 16 muaj, ose 505 ditë, në total.

Individi i paidentifikuar kishte sëmundje të tjera shoqëruese dhe fatkeqësisht vdiq në spital në vitin 2021.

Infeksionet e vazhdueshme si kjo janë ende të rralla, thonë mjekët në Londër.

Shumica e njerëzve pastrojnë natyrshëm virusin, por pacienti në fjalë kishte një sistem imunitar të dobësuar rëndë.

Infeksionet kronike si këto kanë nevojë për studim për ta përmirësuar të kuptuarit tonë për Covid-in dhe rreziqet që ai mund të sjellë, thonë ekspertët.

Pacienti në fjalë u infektua për herë të parë me Covid në fillim të vitit 2020. Ai pati simptoma dhe infeksioni u konfirmua me një test PCR.

Ai hyri dhe doli nga spitali shumë herë gjatë 72 javëve të ardhshme, si për kontrolle rutinë ashtu edhe për kujdes.

Mjekët, nga King’s College London dhe Guy’s dhe St Thomas’ NHS Foundation Trust, thonë se analiza e detajuar laboratorike zbuloi se ishte i njëjti infeksion, i vazhdueshëm, në vend të periudhave të shkurtra të përsëritura.

Pacienti nuk mund ta shëronte infeksionin, edhe pasi iu dhanë barna antivirale.

Kjo është e ndryshme nga “Covid afatgjatë”, ku virusi pastrohet nga trupi, porse simptomat vazhdojnë.

Një nga mjekët që do t’i prezantojë gjetjet në një konferencë mjekësore – Kongresi Evropian i Mikrobiologjisë Klinike dhe Sëmundjeve Infektive – është Dr Luke Blagdon Snell.

Ai i tha BBC-së: “Këto ishin teste të fytit që ishin pozitive çdo herë. Pacienti kurrë nuk pati një test negativ. Dhe ne mund të themi se ishte një infeksion i vazhdueshëm sepse nënshkrimi gjenetik i tij – informacioni që morëm nga renditja e gjenomit viral – ishte unike dhe konstante në atë pacient.”

Infeksionet e zgjatura janë të rralla, por të rëndësishme, thonë studiuesit, sepse ato mund të shkaktojnë variante të reja të Covid – edhe pse kjo nuk ndodhi në këtë rast.

Dr Snell tha se “virusi është ende duke u përshtatur me strehuesin e njeriut kur njerëzit janë të infektuar për një kohë të gjatë. Mund të ofrojë një mundësi që Covid-19 të grumbullojë mutacione të reja.

“Disa nga këta pacientë që i kemi studiuar kanë mutacione që janë parë në disa nga variantet shqetësuese.”

Ai theksoi se asnjë nga nëntë pacientët që ata e kontrolluan nuk kishte krijuar një variant të ri të rrezikshëm.

Dikush me një infeksion kronik mund të mos jetë ngjitës për të tjerët, shtoi ai./BBC