Afro 17 mijë raste me grip sezonal, IKShPK jep këshilla për mbrojte

Instituti Kombëtar i Shëndetësisë Publike ka njoftuar se rastet e gripit sezonal janë duke shënuar rritje në të gjitha komunat e Kosovës përveç atyre më shumicë serbe.

Duke e marrë parasysh këtë situatë, Instituti Kombëtar i Shëndetësisë Publike ka treguar se prej 1 tetor 2019 deri më 5 janar 2020 janë raportuar gjithsej 16.588 raste të dyshimta në grip, 2.931 raste infeksione respiratore akute dhe 13 raste me infeksion të rëndë respirator akut.

Numër më i madh i rasteve raportohet nga komuna e Prishtinës dhe Prizrenit, por nuk kalon pragun epidemik.

Me këtë rast IKShPK ka ofruar edhe një sërë rekomandimesh që duhet t’i ndjekin qytetarët për të mos u prekur nga gripi sezonal.

Postimi i plotë i IKShPK:

Instituti Kombëtar i Shëndetësisë Publike gjatë tërë vitit bën mbikëqyrjen permanente të Influencës sezonale me intensifikim të aktiviteteve gjatë sezonës përkatëse tetor-maj.

Prej 01 tetor 2019 deri më 05 Janar 2020 në Institutin Kombëtar të Shëndetësisë Publike janë raportuar gjithsej 16.588 raste të dyshimta në Grip, 2931 raste Infeksione respiratore akute dhe 13 raste me Infeksion të rëndë respirator akut.

Rastet raportohen nga të gjitha komunat e Republikës së Kosovës me përjashtim të komunave me popullatë serbe.

Numër më i madh i rasteve raportohet nga komuna e Prishtinës dhe Prizrenit, por nuk kalon pragun epidemik.

Prej 01 tetor 2019 deri më 5 Janar 2020 në Institutin Kombëtar të Shëndetësisë Publike janë testuar gjithsej 109 mostra të dyshimta në Grip, prej të cilave 9 mostra kanë rezultuar positive në grip A dhe një pozitive në grip B.

Në Klinikën Infektive- SHSKUK prej 1 tetorit deri sot janë të hospitalizuar janë hospitalizuar 349 raste me Dg. Bronchopneumonia (ARI), 15 raste me Dg. ILI dhe 13 raste me Dg.SARI

Instituti Kombëtar apelon te të gjithë Drejtorët Rajonal të Shëndetësisë Publike të ngritet niveli i vigjilencës dhe raportimit të rasteve të dyshimta në të gjitha institucionet shëndetësore publike dhe private në Kosovë.

E përsërisim rekomandimin tonë që Inspektorati shëndetësor të mbikëqyrë të gjitha Institucionet shëndetësore të Kosovës për të urdhëruar për obligimin ligjor të paraqitjes së sëmundjeve ngjitëse.

Zyrtarët e Institutit Kombëtar të Shëndetësisë së Kosovës tërheqin vërejtjen se virusi A bën pjesë në grupin e viruseve të gripit të zakonshëm sezonal.

Si të mbroni vehten dhe të tjerët:

Të vaksinohen të gjithë personat e moshuar mbi 65 vjet dhe personat me sëmundje kronike në të gjitha qendrat e mjekësisē familiare.

Të redukohet numri i vizitave të familjarve tek personat të hospitalizuar (SHSKUK, Spitalet rajonale).

Të evitohen vendet e mbyllura dhe të mbingarkuara me njerëz.

Nëse keni shenja te gripit, kërkoni menjëherë ndihmë mjekësore

Nëse keni shenja të gripit mbani distancë të paktën 1 metër prej njerezve

Mbuloni hundën dhe gojën me faculetë në rast të kollës apo teshtitjes.

Shmangni prekjen e syve hundës apo gojës me duar të papastruara

Nëse keni shenja të gripit, mos shkoni në punë, shkollë apo vende me shumë njerëz, por qëndroni në shtëpi

Shmangni përqafimin, puthjen dhe shtrëngimin e duarve kur përshëndeteni

Hidhni faculetën në vendin e duhur menjëherë pas përdorimit

Pastroni rregullisht duart me ujë dhe sapun dhe dezinfektoni mjediset ku qëndroni

Ushqehuni shëndetshëm duke përdorë më shumë vitamina dhe bëni aktivitet fizik

E drejta e juaj është ta mbroni shëndetin tuaj

Instituti Kombëtar i Shëndetësisë së Kosovës ka rritur vigjilencën për t’u përballur me raste eventuale të Gripit dhe është në gjendje gadishmërie të përcjellë situatën epidemiologjike dhe për çdo ndryshim të situatës do të informoheni me kohë.