Dhoma e mbledhjes së Këshillit të Sigurimit të OKB-së
ShBA dhe Britania kërkojnë pranimin e Policisë së Kosovës në INTERPOL
Shtetet e Bashkuara dhe Britania e Madhe kanë kërkuar nga vendet e OKB-së që të votojnë pro Policisë së Kosovës që të bëhet pjesë e INTERPOL-it.
Në mbledhjen e sotme të Këshillit të Sigurimit të Kombeve të Bashkuara rreth raportit të shefit të UNMIK-ut për gjendjen në Kosovë, përfaqësuesja e Mbretërisë së Bashkuar tha se Kosova për dallim nga para dy dekadave ka shkuar shumë larg përpara.
Si shembull më të mirë për këtë ajo përmendi Policinë e Kosovës.
Prandaj, përfaqësuesja e Britanisë kërkoi që Policia e Kosovës të pranohet në INTERPOL gjatë mbledhjes së Asamblesë së Përgjithshme të kësaj organizate që mbahet javën tjetër.
Sipas përfaqësueses së Britanisë, anëtarësimi i Kosovës në INTERPOL do të kontribuonte në luftimin e krimit jo vetëm në Kosovë por edhe në rajon e në botë. “Kjo do të ishte e mirë edhe për vetë Serbinë“, tha ajo,
Ndërsa, përfaqësuesi i Shteteve të Bashkuara në Këshillin e Sigurimit të OKB-së u bëri thirrje vendeve që nuk e kanë njohur pavarësinë e Kosovës që ta bëjnë këtë.
Ai, po ashtu, u bëri thirrje anëtarëve të INTERPOL-it që ta pranojnë edhe Kosovën në këtë organizatë.
“Policia e Kosovës në INTERPOL do të mundësojë veprime të shtuara drejt paqes dhe stabilitetit”, theksoi ai.
Gjithashtu, përfaqësuesi i Shteteve të Bashkuara tha se vendi i tij inkurajon Kosovën dhe Serbinë në arritjen e një marrëveshjeje afatgjatë, e cila do të rezultonte me normalizimin e raporteve dhe njohjen reciproke.
Sa i përket UNMIK-ut, zyrtari amerikan tha se ky mision ka përmbushur detyrat dhe duhet të tërhiqet.