Takimi i Presidentit Hashim Thaçi me sekretarin Michael Pompeo

Sekretari amerikan Michael Pompeo pret në takim Presidentin Thaçi

Presidenti Hashim Thaçi është pritur në takim nga Sekretari amerikan i Shtetit, Michael Pompeo.

“Sekretari i Shtetit Michael R. Pompeo takohet me Presidentin e Kosovës Hashim Thaçi në Departamentin e Shtetit”, thuhet në faqen zyrtare të Departamentit Amerikan të Shtetit në Twitter.

Pas takimit, Presidenti Hashim Thaçi ka shkruar në Twitter se takimi me sekretarin Pompeo ishte i shkëlqyeshëm.

“Takim i shkëlqyeshëm me sekretarin Pompeo. Kosova është e bekuar që ka mbështetjen e SHBA në të gjitha fazat e luftës sonë për liri dhe pavarësi. Tani jemi duke punuar së bashku për të arritur marrëveshje gjithëpërfshirëse mes Kosovës dhe Serbisë për të siguruar paqe dhe garantimin e anëtarësimit të Kosovës në Kombet e Bashkuara, NATO dhe Bashkim Evropian”, ka shkruar Thaçi.

Sipas një komunikate të Presidencës së Kosovës, Presidenti Thaçi e ka falënderuar sekretarin Pompeo për mbështetjen e administratës Trump për Kosovën dhe për mbështetjen historike që populli amerikan i ka dhënë popullit të Kosovës.

“Kam shprehur konsideratën më të lartë në emrin tim dhe të popullit të Kosovës, për çdo gjë që SHBA-ja ka bërë për lirinë e popullit tonë dhe paqen në rajon. Përjetësisht do të jemi mirënjohës”, ka thënë pas takimit presidenti Thaçi.

Në këtë takim është biseduar edhe për mandatin e ri të FSK-së, si një forcë shumetnike dhe për bashkëpunimin rajonal dhe perspektivën euroatlantike të Kosovës.

Presidenti Thaçi, po ashtu, e ka falënderuar sekretarin Pompeo për mbështetjen që i ka dhënë procesit të transformimit të FSK-së në forcë të armatosur.

“Kosova si shtet sovran ka të drejtë sovrane dhe detyrim që t’i ngrisë kapacitetet e sigurisë. Tani është koha që nga konsumues të bëhemi kontribuues të paqes dhe stabilitetit në rajon dhe më gjerë”, ka shtuar ai.

Sipas komunikatës, Presidenti Thaçi dhe sekretari Pompeo, po ashtu, kanë biseduar për fazën e fundit të dialogut për normalizimin e marrëdhënieve ndërmjet Kosovës dhe Serbisë.

“SHBA-ja mbështet Kosovën për arritjen e një marrëveshjeje gjithëpërfshirëse me Serbinë, e cila i hap rrugë njohjes reciproke dhe anëtarësimit të Kosovës në NATO, BE dhe OKB”, citohet të ketë thënë presidenti Thaçi.

Mbështetja e SHBA-së, sipas presidentit Thaçi, është përcaktues për arritjen e kësaj marrëveshjeje dhe krijimin e një konsensusi më të madh brenda dhe jashtë Kosovës.

“Ishte konkludim i përbashkët se nëse nuk e shfrytëzojmë këtë momentum historik, ne rrezikojmë të hyjmë në një cikël të rrezikshëm jo vetëm si Kosovë, por edhe si rajon. Prandaj, mënyra e vetme për ta mbyllur njëherë e përgjithmonë çështjen e Ballkanit është arritja e një marrëveshjeje përfundimtare mes Kosovës dhe Serbisë”, ka thënë presidenti Thaçi.

Nga ana tjetër, Sekretari i Shtetit amerikan, Mike Pompeo, ka theksuar se SHBA-ja do të vazhdojë mbështetjen e Kosovës, me theks të veçantë arritjen e një marrëveshjeje gjithëpërfshirëse dhe ligjërisht obliguese ndërmjet Kosovës dhe Serbisë, thuhet në komunikatë.

Presidenti Thaçi do të vazhdojë të zhvillojë takime me përfaqësues të institucioneve të ndryshme në Uashington.