SBAShK:Sot nuk u mbajt mësimi në shumicën absolute të shkollave
Po vazhdon lufta në mes Ministrisë së Arsimit dhe Sindikatës së Mësimdhënësve lidhur me kompensimin e orëve të humbura nga greva tre javëshe e sindikatës që u mbajt në janar.
Sipas vendimit të MAShT-it, orët e humbura duhet të kompensohen duke hequr pushimin pranveror, duke shtyrë përfundimin e vitit shkollor dhe duke mbajtur mësim në pesë të shtunë.
Megjithatë, sindikata ka kundërshtuar fuqishëm duke bojkotuar mësimin në këto ditë të parapara dhe duke paditur MAShT-in.
Sot, sipas SBAShK-ut, shumica e shkollave nuk kanë mbajtur mësim ndërsa MAShT deri më tani ka qëndruar i heshtur lidhur me këtë çështje.
“Nga raportet e arritura nga komunat e Kosovës vërehet se shumica absolute e shkollave të Kosovës sot nuk kanë punuar . Kjo do të thotë se ato respektojnë në tërësi vendimin e Këshillit Drejtues që orët e humbura të grevës të mos kompensohen, por të pritet vendimi meritor i Gjykatës Themelore në Prishtinë pasi që SBASHK ka dërguar padi në këtë Gjykatë ndaj vendimit të MASHT lidhur me kompensimin e orëve të humbura në grevë.”, thuhet në njoftimin e SBAShK-ut.
“Ka raste në ndonjë komunë, aty e këtu, kur është tentuar të mbahet mësimi në ndonjë shkollë, por numri i nxënësve ka qenë tepër i vogël dhe kjo tendencë e ndonjë drejtori a DKA-ja ka shkuar e kotë. “, shtuan ata.
Ata i bënë thirrje “MASHT-it, Drejtorive Arsimore Komunale dhe edhe ndonjë drejtori tekanjoz që të lënë presionet dhe tendencën për të krijuar situatë se gjoja po zëvendësohen orët e humbura në grevë”.
https://kallxo.com/injorohet-vendimi-i-masht-ne-shume-shkolla-nuk-mbahet-mesimi/