Rreth 500 të Sëmurë nga Produktet Ushqimore

Shëndeti i konsumatorëve mbetet i rrezikuar prej produkteve ushqimore të dyshimta, ngase vetëm për vitin 2017 janë trajtuar rreth 500 raste në Klinikën Infektive të shkaktuara prej produkteve ushqimore.

Drejtori i Klinikës Infektive në Shërbimin Spitalor dhe Klinik Universitar të Kosovës, Hamdi Ramdani ka thënë se nga këto raste, diku 206 qytetarë kanë qenë të sëmurë me intoksikacione, kurse, 279 të sëmurë ishin me salmonella dhe me interokolite.

Megjithatë, sipas tij, fatmirësisht nuk ka pasur asnjë të vdekur nga ushqimet.

“Në total, nga janari deri më sot numri është diku 485 raste dhe Klinika Infektive referohet nga të gjitha qendrat spitalore në nivel të Kosovës, edhe nga shtëpitë e shëndetit. Nga këto raste, diku 206 raste intoksikacioni, kurse 279 me të sëmurë ishin me salmonella dhe me interokolite. Kurse, nuk është hyrë edhe numri i helmimeve me shkaktar virusal. Kështu që alarmante në asnjë mënyrë nuk ka pasur nevojë të bëhet. Sëmundshmëria është në rënie krahasuar me vitet e mëparshme”, ka theksuar Ramadani, transmeton Rtv21.tv.

Drejtori i Klinikes Infektive ka apeluar tek të gjithë qytetarët që të kenë kujdes gjatë blerjes dhe përdorimit të produkteve ushqimore.

Ndërsa, kryetari i shoqatës “Konsumatori”, Selatin Kaçaniku ka thënë se qytetarët në vazhdimësi mbeten të rrezikuar nga konsumi i produkteve ushqimore, ngase fatkeqësisht ka pasur raste edhe me fatalitet vite më parë.

“Rastet specifike të cilat kanë ndikuar në shëndetin ndaj qytetarit konsumator, kemi pasur fatkeqësisht edhe raste që shëndeti ka qenë dukshëm i rënduar mos të them i rrezikuar, por pata dy vitesh kemi pasur një rast edhe kur ushqimi jo i sigurt ka ndikuar edhe në provokimin e sëmundjes që e ka pasur qytetari konsumator dhe ai për fat të keq ka ndërruar jetë. Dhe nëse këtë çështje e lidhim me momentin aktual kur ne kemi fushata të shumta në kuadër të festive të fundvitit, shohim se ofertat e mishrave janë të tilla se nuk shihen nga ngrirja, dhe del se ushqimet në veçanti mishrat e ngrirë, pemët e perimet e ngrira lënë shumë për të diskutuar”, ka thënë Kaçaniku.

Ai ka shtuar tutje se përkundër që nuk ka siguri dhe mbrojtje, e drejta e qytetarit konsumator është në raport shumë të drejt krahasuar me nivelin e zbatushëmrisë së ligjeve për mbrojtjen e konsumatorëve.

Ndryshe, drejtues të Agjencisë së Ushqimit dhe Veterinës kanë thënë se brenda vitit 2017, kanë asgjësuar rreth 500 mijë tonelata produkte ushqimore që përbëjnë produktet e mishit, qumështit, pijeve dhe të tjera. /Rtv21