Adem Grabovci - Foto: KALLXO.com

Rikthimi jetëshkurtër i Adem Grabovcit në strukturat e PDK-së

Partia Demokratike e Kosovës ditë më parë mbajti kuvendin zgjedhor ku nxori kandidatët më të votuar për Këshillin Drejtues të kësaj partie.

Ish- deputeti i PDK-së, Adem Grabovci në këtë garë të brendshme të partisë së Kadri Veseli mori 323 vota.

Por, ai mund të mos e mbajë postin të cilin e fitoi të dielën.

Sot, kreu i Partisë Demokratike të Kosovës, Kadri Veseli mori vendim që të gjithë zyrtarët e parisë që kanë aktakuza të lirohen nga detyra zyrtare dhe funksionet brenda partisë.

Adem Grabovci akuzohet në rastin e njohur “Pronto”.

Pas ngritjes së aktakuzës, Adem Grabovci ishte larguar nga skena publike politike duke u kufizuar vetëm në disa tubime të mbyllura të partisë dhe takimeve me drejtues të saj.

Për një kohë, ishte raportuar se do të provojë të kandidojë edhe për kreun e degës së PDK-së në Pejë, por nuk e shpalli kandidaturën.

Sipas Prokurorisë Speciale, të akuzuarit akuzohen për kryerjen e veprës penale Shkelja e statusit të barabartë të shtetasve dhe banorëve të Republikës së Kosovës në bashkëkryerje, nga neni 193 paragrafi 4 lidhur me paragrafin 1 të KPRK-së, lidhur me nenin 31 të KPRK-së, prej të cilave disa prej veprave kanë mbetur në tentativë.

Sipas aktakuzës, të pandehurit kanë keqpërdorur pozitat e tyre zyrtare duke bashkëpunuar në mes vete për dhënien e privilegjeve dhe përparësive kundërligjshme personave të cilët kanë konkurruar në funksione të rëndësishme, siç janë: drejtor për Ndërmarrjet publike qendrore, Kryeshef Ekzekutiv i Agjencisë së Regjistrimit në Ministrinë e Punëve të Brendshme, Kryeshef i Agjencisë për produkte medicinale dhe Koordinator i Qendrës së Regjistrimit Civil në Komunën e Klinës, duke mohuar dhe kufizuar liritë dhe të drejtat e kandidatëve të tjerë, të garantuara me ligj.

KALLXO.com pati raportuar se në prill të këtij viti, Prokuroria Speciale e Republikës së Kosovës ngriti aktakuzë në rastin e quajtur “Pronto”.

Në këtë çështje penale janë të akuzuar njëmbëdhjetë persona me funksione të larta zyrtare.

Adem Grabovci, Besim Beqaj, Zenun Pajaziti, Arbenita Pajaziti, Ilhami Gashi, Njazi Kryeziu, Fatmir Shurdhaj, Sedat Gashi, Ismet Neziraj, Xhavit Dakaj, Rexhë Abazi, janë të akuzuarit e Prokurorisë Speciale.

https://kallxo.com/vendimi-i-apelit-adem-grabovci-dhe-te-tjeret-do-te-gjykohen-per-rastin-pronto/