Rama: Të bashkohemi në një fanellë kuqezi

Kryeministri i Shqipërisë, Edi Rama i bëri thirrje edhe njëherë opozitës të mos bashkëpunojnë me asnjë faktor europian që do ta pengojë Shqipërinë në këtë proces.

Ai në konferencën e përbashkët me shefen e diplomacisë europiane Federica Mogherini tha se Shqipëria i ka boll nëpër Europë ata që duan t’i nxjerrin bishta dhe që nuk e kanë problem t’i vënë shkopinj nën rrota, andaj nuk ka kuptim që t’u bashkohet qoftë edhe një shqiptar i vetëm.

“Dua t’u lutem si shqiptar, si qytetar dhe jo si kryeministër, përfaqësuesve të opozitës të mos bashkëpunojnë me asnjë faktor uvropian që do ta pengojë Shqipërinë në këtë proces. Të mos ushqejnë zyra deputetësh andej këtej me gënjeshtra dhe të mos eksportojnë baltën e luftës sonë politike, por ta lënë mënjanë këtë”, tha Rama.

Ai kërkoi që pozitë e opozitë të jenë bashkë kur flasin për Shqipërinë jashtë saj.

“E ftoj Bashën që të bëjë bashkë një skuadër kombëtare me fanellën kuqezi, kur flasim për Shqipërinë jashtë Shqipërisë. Nuk kam fituar unë, nuk ka fituar qeveria, nuk ka fituar PS, por kanë fituar të gjithë shqiptarët”, tha Rama.

Për Shqipërinë dhe Maqedoninë në Raportin e progresit të publikuar është rekomanduar hapja e negociatave për anëtarësim në BE.