Ilustrimi: Trembelat/ Jeta Dobranja
Qeveria e Haradinajt me një Këmbë në Pushtet
Pas daljes në opozitë të Listës Serbe dhe deklaratave të disa zyrtarëve të AKR-së se do largohen nga Qeveria, Haradinaj është duke qëndruar me një këmbë në pushtet.
Janë vetëm 61 vota që e mbajnë Haradinajn kryeministër, aq sa duhen edhe për ta rrëzuar atë.
Kryeministri Ramush Haradinaj javën e kaluar kërkoi largimin nga detyra të ministrit të Punëve të Brendshme Flamur Sefaj dhe shefit të AKI-së, Driton Gashi, pas deportimit të 6 shtetasve turq nga Kosova për në Turqi.
Aleanca Kosova e Re sot nëpërmjet një komunikate njoftoi se Sefaj e ka pranuar kërkesën e Haradinajt për lirim nga detyra.
Por, dje nga kjo parti erdhën reagime të ndryshme rreth kërkesës së kryeministrit për ministrin.
Gjatë ditës së djeshme, partia e Sefajt është takuar pikërisht për ta diskutuar kërkesën e Haradinajt për lirim të ministrit nga detyra.
Interpretimet e strukturave të AKR-së nga ky takim kanë qenë të ndryshme.
Zyrtari i AKR-së, Rrahim Pacolli dje përmes një statusi në Facebook ka deklaruar se nëse Sefaj lëshon detyrën e ministrit të Brendshëm, AKR-ja largohet nga Qeveria.
http://kallxo.com/kercenon-pacolli-nese-ministri-sefaj-nuk-e-vazhdon-punen-akr-del-nga-qeveria/
Pak më vonë, atij i është përgjigjur vetë kryetari i partisë, Behgjet Pacolli që ka thënë se janë vetëm kuvendi dhe organet tjera të partisë që mund të marrin vendime për të ardhmen e AKR-së.
Koalicioni PAN ka 40 deputetë. Mirëpo PAN-i me Listën Serbe dhe me minoritetet tjera joserbe numëron fiks 60 deputetë. Plus me dy deputetët e AKR-së, Islam Pacollin dhe Labinot Tahirin, ky koalicion ka 62 deputetë.
Me daljen eventuale të AKR-së nga koalicioni, Qeveria e Kosovës do të jetë plotësisht e barabartë me opozitën.
Në anën tjetër edhe Lista Serbe javë më parë përmes një komunikate deklaroi se do të largohet nga Qeveria, ndërsa deputetët e saj thanë në Kuvend se në të ardhmen do të jenë opozitë. Kjo i bie që koalicioni qeverisës ka edhe 10 vota më pak.
AKR-ja, që në qershor garonte në një listë të përbashkët me LDK-në, kishte 4 deputetë: Behgjet Pacollin, Islam Pacollin, Labinot Tahirin dhe Korab Sejdiun.
Mirëpo pas vendimit për të hyrë në Qeveri me PAN-in, deputeti Korab Sejdiu dha dorëheqja nga partia dhe grupi parlamentar dhe tani është deputet i pavarur.
Ndërsa kur Pacolli vendosi ta lëshojë karrigen e deputetit për t’u bërë pastaj pjesë e Qeverisë, vendin e tij e mori kandidati që ishte në pritje, e që ishte pjesë e LDK-së.
Tani, AKR në Kuvendin e Kosovës ka vetëm dy deputetë.
Në rast të ndonjë mocioni të mosbesimit ndaj Qeverisë, votat e deputetëve të AKR-së janë vendimtare.
Në anën tjetër, Haradinaj nuk e ka “bekimin” plotë as të partnerit të kamotshëm, Nismës Socialdemokrate.
Në shtator të vitit të kaluar, kur u votua Qeveria Haradinaj, deputeti i Nismës Zafir Berisha nuk e kishte votuar Qeverinë e Ramush Haradinajt.
http://kallxo.com/zafir-berisha-nuk-e-voton-qeverine-haradinaj-2/
KALLXO.com ka provuar ta kontaktojë deputetin Berisha për ta pyetur se cili do të ishte qëndrimi/vota e tij nëse do të kishte mocion mosbesimi ndaj Qeverisë.
Haradinaj erdhi në krye të Qeverisë më 9 shtator të vitit të kaluar me 61 vota pro.
http://kallxo.com/kalon-ne-kuvend-qeveria-haradinaj/
LDK-ja kohëve të fundit ka kërkuar dakordim të subjekteve politike për zgjedhje të reja.