Alex Whiting, shef i Hetimeve në Prokurorinë e Specializuar

Prokurori i Limajt në Hagë tani shef i hetimeve për Gjykatën Speciale

Alex Whiting, ish prokurori në Rastin e zëvendës kryeministrit Fatmir Limaj në procesin gjyqësor në Hagë, tani i është bashkuar Zyrës së Prokurorit Special si shef i hetimeve.

Ketë me anë të një njoftimi për media e bëri të ditur zyra e Prokurorisë së Specializuar.

Sipas këtij njoftimi, prokurori Alex Whiting i bashkohet Zyrës së Prokurorit të Specializuar si Shef i Hetimeve/Grupit Hetimor.

Whiting, i moshës 54 vjeçare, është një prokuror me shtetësi franceze dhe amerikane me përvojë të gjerë në fushat e ndjekjes penale kombëtare dhe asaj ndërkombëtare, duke përfshirë punë në Gjykatën Penale Ndërkombëtare (GjPN) dhe Tribunalin Penal Ndërkombëtar për ish-Jugosllavinë (TPNJ) e me një karrierë akademike të shquar.

Whiting vjen te ZPS-ja nga Fakulteti Juridik i Harvardit ku ishte profesor i praktikës që në vitin 2013.

Gjatë periudhës midis 2010 dhe 2013, Whiting punoi në Zyën e Prokurorit të GjPN-së fillimisht në funksionin e Koordinatorit të Hetimeve, në mbikëqyrje të të gjitha hetimeve, dhe më pas si Koordinator i Ndjekjeve Penale duke pasur në mbikëqyrje të gjitha ndjekjet penale.

Përpara se t’i bashkohej GjPN-së, Whiting jepte mësim si profesor asistent i praktikës në Fakultetin Juridik të Harvardit.

Gjatë periudhës midis 2002 e 2007, Whiting punoi për TPNJ-në, ku ka qenë prokuror kryesor në gjykimin e Fatmir Limajt, Isak Musliut e Haradin Balajt dhe prokuror kryesor në gjykimet e Milan Martiqit dhe Dragomir Milosheviqit.

Përpara se t’i bashkohet TPNJ-së Whiting ishte prokuror federal në Shtetet e Bashkuara, fillimisht në Sektorin e Kriminalistikës së Departamentit të të Drejtave Civile në Washington DC e më pas me Zyrën e Prokurorit Federal në Boston, Massachusetts, ku ka përqendruar në rastet e krimit të organizuar dhe korrupsionit.

Whiting është diplomuar në Kolegjin Yale dhe në Fakultetin Juridik Yale.

13 Qershor 2019 - 11:39

Kastriot Berisha 13/06/2019 - 11:39
NDËRVEPRIMI0
Prishtina Insight
NA NDIQNI

Send this to a friend