BREXIt - Foto: REL

Parlamenti britanik kundërshton BREXIT-in pa pakt

Ligjvënësit britanikë kanë votuar kundër largimit pa pakt nga Bashkimi Europian, pavarësisht skenarëve në të ardhmen.

Me 321 vota për dhe 278 kundër ata i kanë bërë thirrje Qeverisë Britanike që të përjashtojë nga mundësia një Brexit pa pakt.

Kryeministrja britanike, Theresa May ka thënë se “një shumicë e qartë” ka votuar kundër një Brexiti pa marrëveshje, ndonëse “rregulloret ligjore” përcaktojnë se Mbretëria e Bashkuar do të mund të largohej pa pakt nga blloku europian më 29 mars, nëse nuk krijohen kushte për marrëveshje.

Deputetët britanikë kanë votuar tre herë gjatë së mërkurës mbrëma.

Herën e parë dhe atë të tretë kanë votuar kundër një Brexiti pa pakt, derisa në herën e dytë kanë kundërshtuar një amendament të propozuar nga Damian Green, ish-njeriu i dytë në kabientin e kryeministres britanike, Theresa May, i cili në parim ishte mbështetur si nga përkrahësit ashtu edhe kundërshtarët e Brexitit.

Amendamenti i kundërshtuar ishte plan që parashihte shtyrjen e largimit të Britanisë nga BE-ja deri më 22 maj të vitit 2019, në mënyrë që të ketë “Brexit të menaxhuar pa pakt”.

Ky dokument, i refuzuar tanimë nga deputetët, njihet si Kompromisi i Malthouse, sipas ministrit, Kit Malthouse, që ka hartuar atë.

Votimet e së mërkurës mbrëma janë rezultat i refuzimit të planit të kryeministres May për largim nga blloku europian, një ditë më parë.

Përveç kësaj, deputetët britanikë do të votojnë të enjten për shtyrje të Brexitit, dhe nëse edhe BE-ja pajtohet, atëherë Mbretëria e Bashkuara nuk do të largohet nga blloku europian më 29 mars, ashtu siç ishte planifikuar fillimisht.

Aktualisht duket se nuk ka pajtueshmëri në Britani për lidhjen që do të ketë shteti i tyre në të ardhmen me BE-në.

Çështja kryesore e diskutimit mbetet kufiri irlanez dhe kufiri i ashpër që mund të vendoset aty për mallra pas 29 marsit.

Vendimi për Brexit ka ardhur pasi 52 për qind e votuesve kanë votuar për dalje të Britanisë nga BE-ja në krahasim me 48 për qind që kanë kundërshtuar atë, në referendumin e mbajtur më 2016. (REL)