Parashikimi i motit për javën e ardhshme

Instituti Hidrometeorologjik i Kosovës ka publikuar të dhënat për motin në javën e ardhshme.

Sipas tyre do të mbajë mot me vranësira të ndërrueshme dhe intervale të shkurta me diell.

Vranësirat gjatë dy ditëve të para të javës kanë mundësi që të shoqërohen me reshje të dobëta bore.

Më tej, Instituti thekson se masat e ajrit do të jenë pak sa më të ngrohta duke ndikuar në ngritjen e grafikut të temperaturave maksimale, por vranësirat herë-herë do të fuqizohen në periudha të ndryshme kohore duke mundësuar të kemi edhe reshje të dobëta shiu, shkruan rtv21.tv.

“Kjo javë, që është java e fundit e stinës së vjeshtës do t’i ngjasoj periudhës dimërore sa i përket gjendjes meteorologjike, pasi që temperaturat minimale do të zbresin nën vlerat e mesatareve të viteve tjera, duke bërë që merkuri në termometër të zbresë deri -7 gradë Celsius.”, thuhet në komunikatën e IHMK.

Temperaturat minimale parashihen të lëvizin ndërmjet -7 deri -2 gradë Celsius, ndërsa maksimalet e ditës parashihen të lëvizin ndërmjet -1 deri 4 gradë Celsius.

Do të fryjë erë nga verilindja dhe jugperëndimi me shpejtësi 1-7m/s./21Media