Paralajmërohet protestë nga punëtorët e KEK-ut kundër Ligjit për Paga

Sindikata e Re Korporata Energjetike e Kosovës ka paralajmëruar protesta dhe greva kundër Ligjit për Paga.

Në një komunikatë për media kjo sindikatë bënë të ditur se vendimi për mosngritje të pagave për këtë kategori, ka për qëllim mbylljen e Termocentralit Kosova A dhe privatizimin e Termocentralit Kosova B.

“Në Kosovë që nga paslufta e deri më tani asgjë nuk është bërë rastësisht dhe asgjë në favor të punëtorëve, ne jemi dëshmitarë të ndarjes së Korporatës Energjetike të Kosovës në shoqëri aksionere e në Privatizime e në fund falimentime, jemi dëshmitarë të Privatizimit të distribucionit Elektrokosova, ku deri në atë kohë kemi pasur paga shumë të ulëta e që qëllimi i mosngritjes së pagave ishte përgatitja për privatizimin e gjysmës së KEK-ut. Sot po shihet një rrugë e njëjtë, përgatitje me ligj për paga për Ndërmarrjet publike në këtë rast KEK-un, sikurse po shihet qartë se tendencë e Qeverisë së Republikës së Kosovës është mbyllja e Kosovës A dhe krijimi i favoreve të mëdha një kompanie tjetër në kurriz të KEK-ut dhe të qytetarëve të Kosovës, dhe në fund edhe Privatizimi i asetit kryesor të KEK-ut Termocentrali Kosova B që do të thotë shuarjen e Kompanisë tonë KEK-un”, bëhet e ditur në reagim.

Sindikata e Re Korporata Energjetike e Kosovës ndër tjerash ka bërë të ditur se ka marrë një përgjigje të mangët për ligjin e pagave, ku përfshihen edhe ndërmarrjet publike e që kjo ka ndodhur pas protestës së mbajtur nga SRKEK-u.

“Të nderuar punëmarrës të KEK-ut në jemi të vetëdijshëm se çfarë është duke u bërë për të drejtat e punëtorëve në Kosovë, dhe nuk presim shumë që dikush të zgjidh problemin tonë pa protesta e GREVA, kështu që janë duke u shtjerrë mundësitë tjera”, bëhet e ditur më tej në reagim./RTV21