Paraburgim për shtetasin nga Shqipëria për bixhoz të paligjshëm

Gjykata Themelore Prizren ka lëshuar komunikatë nëpërmjet të cilës ka lajmëruar se i është caktuar masa e paraburgimit një shtetasi nga Shqipëria për shkak të veprës penale të organizimit të bixhozit të paligjshëm.

Në njoftimin e Gjykatës Themelore Prizren thuhet se ‘Gjykata ka vendosur sipas kërkesës së Prokurorisë Themelore të Prizrenit duke caktuar masën e paraburgimit në kohë zgjatje prej një muaji ndaj të pandehurit me iniciale G.K. nga Elbasani për shkak të dyshimit të bazuar se në bashkëkryerje ka kryer veprën penale të organizimit të skemave piramidale dhe bixhozit të paligjshëm.

Masa e paraburgimit do ti llogaritet prej momentit të arrestimit më 16.10.2018 deri më 16.11.2018’.

Prokuroria e Shtetit ka parashtruar kërkesën për paraburgim për shkak të dyshimit të bazuar se nga data e pavërtetuar e deri me datën 09.12.2016, me qëllim të përfitimit të kundërligjshëm të dobisë pasurore për vete dhe për tjetrin i pandehuri me iniciale G.K. në cilësinë e drejtorit dhe bashkëpronar i Kompanisë “LlotoSport” së bashku me të pandehurin me iniciale B.S. menaxher rajonal i “LlotoSport” në Prizren dhe A.H. mbikëqyrës, organizojnë, marrin pjesë në organizimin e lojërave të fatit, për të cilat nuk është dhënë licenca nga organi kompetent, si dhe lojërave të ndaluara me ligj, në atë mënyrë që gjatë zbatimit të urdhër kontrollit të Policisë në bashkëpunim edhe me disa agjencione shtetërore, me datë 09.12.2016 rreth orës 21.40 minuta është gjetur se bastorja sportive “LlotoSport” si dhe bastore tjera “Kasëmbeg” pra punojnë pa licenca ashtu  që i pandehuri A.H. në cilësinë e mbikëqyrësit të bastoreve ia mundëson të pandehurit me iniciale B.S. nga bastet të fitonte 2.100 euro ndërsa i pandehuri me iniciale G.K. vetëm nga bastet ka realizuar përfitim 45.600 euro ndërsa nga mos licencimi  i bastoreve fiton 25.000 euro e cila rezulton me një përfitim prej 70.600 euro, thuhet në komunikatën e Gjykatës Themelore të Prizrenit.