Para takimit me ambasadorin e ShBA-së, këshilltari i Haradinajt: Taksa do të qëndrojë

Taksa e vendosur nga Qeveria e Kosovës ndaj mallrave serbe e boshnjake nuk do të hiqet as nesër as pasnesër.

Kështu ka thënë këshilltari i kryeministrit Ramush Haradinaj, Besnik Tahiri.

“Taksa nuk do të hiqet nesër as pasnesër. Është vendim politik i cili derivon nga një politikë armiqësore e Serbisë sidomos nga fushata e saj kundër anëtarësimit në Interpol dhe për njohjet e Kosovës. Vendimi do të qëndrojë”, tha Besnik Tahiri për KTV-në.

Këto deklarata këshilltari i kryeministrit i bëri një ditë para takimit mes ambasadorit amerikan Kosnett, kryeministrit Haradinaj dhe kryeparlamentarit Veseli.

Ditëve të fundit janë shtuar thirrjet, edhe nga SHBA, që Kosova të heqë taksën prej 100 për qind të vendosur ndaj mallrave të Serbisë dhe Bosnjës në nëntor të vitit të kaluar.