Foto nga takimi i 11 prillit 2015 ndërmjet homologëve Barack Obama e Raul Castro
Obama Arrin në Kubë për një Vizitë Historike
Presidenti i Shteteve të Bashkuara, Barack Obama, ka arritur sot pasdite në Havana për një vizitë historike, e para në Kubë e një presidenti amerikan në detyrë që prej afro një shekulli.
Agjencia AFP njofton se avioni presidencial “Air Force One” ka aterruar pak pas orës 16:15 sipas kohës lokale (21:15 sipas kohës në Evropë) në aeroportin “Jose Marti”, emri i babait të pavarësisë të kësaj ish-kolonie spanjolle.
“Si jeni Kuba?”, ka shkruar në “Tweeter” Obama kur ka arritur në Havana.
Përndryshe, kjo është vizita e parë e një presidenti të Shteteve të Bashkuara në detyrë që nga vizita e Calvin Coolidge e vitit 1928.
Vizita treditore e presidentit Obama synon përafrimin diplomatik mes dy vendeve të armiqësuara që nga koha e Luftës së Ftohtë.
Në këtë udhëtim presidenti amerikan është i shoqëruar nga bashkëshortja dhe dy vajzat e tij.