Një person i arrestuar dhe liruar më pas lidhur me aksidentin ku vdiq basketbollisti Gazmend Sinani
Një person me inicialet A.M. i lindur më 1992, është arrestuar lidhur me aksidentin ku mbeti i vdekur Gazmend Sinani, basketbollist i Kombëtares së Kosovës dhe mbetën të lënduar katër persona tjerë. I njëjti me vendim të prokurorit është liruar.
“Drejtuesi i automjetit A.M. i lindur 1992, fillimisht është arrestuar me urdhër të prokurorit, ndërsa sot në ora 11:00 i njëjti është liruar po ashtu me vendim të prokurorit”, ka thënë për KALLXO.com Lirije Podrimaj, zëdhënëse e Policisë për rajonin e Gjakovës.
Policia e Kosovës ka dhënë detaje nga rasti i vdekjes së basketbollistit të Kosovës, Gazmend Sinanit.
Zëdhënësja e Policisë për rajonin e Gjakovës, Lirije Podrimaj ka thënë për KALLXO.com se me datën 23.06.2018 rreth orës 01:20 minuta në rrugën “Tirana” në Gjakovë ka ndodhur një aksident trafiku, ku ka vdekur një person dhe janë lënduar katër të tjerë.
Sipas policisë, vozitësi kishte humbur kontrollin mbi automjetin e tij, duke u përplasur në një shtyllë të hekurt e më pas duke u rrotulluar.
“Deri te aksidenti ka ardhur nga pa kujdesia e drejtuesit, i cili me automjetin e tij “Mini One” ishte duke lëvizur përgjatë rrugës “Tirana” në drejtim të Stacionit të autobusëve dhe kur arrijnë pikërisht te salla sportive nuk i përshtatet shpejtësisë së lëvizjes së automjetit të tij, ku rruga ishte e lagur dhe kushtet atmosferike duke reshur shi dhe për një moment e humb kontrollin mbi automjetin e tij dhe del jashtë rruge në krahun e djathtë të lëvizjes, ku përplaset për shtyllë të hekurt dhe me pas rrotullohet”, ka deklaruar për KALLXO, Lirije Podrimaj, duke dhënë edhe detaje tjera rreth të lënduarve.
“Si pasojë e aksidentit katër persona tjerë pësojnë lëndime të rënda trupore, ndërsa një person ka ndërruar jetë në vend të ngjarjes sipas konstatimit të mjekut, i cili ka konstatuar vdekjen e tij. Të lënduarit pas marrjes se ndihmës së par në Emergjencën e Gjakovës një prej tyre shtrohet në repartin e kirurgjisë për shërim të mëtejshëm nën mbikëqyrjen e policisë, ndërsa tre personat tjerë dërgohen në QKUK për shërim te mëtejshëm”, ka bërë të ditur Podrimaj.
Siç ka njoftuar Federata e Basketbollit e Kosovës në po të njëjtin aksident lëndime trupore kanë pësuar edhe Granit e Fisnik Rugova, Altin Morina dhe fizioterapeuti i reprezentacionit Kujtim Shala. Sipas policisë, ne lidhje me rastin është njoftuar Prokurori i Shteti kujdestar, i cili ka dalë ne vendin e ngjarjes dhe me urdhër të tij drejtuesi i automjetit është arrestuar, gjithashtu sipas Podrimajt, me urdhër të prokurorit viktima është tërhequr nga vendi i ngjarjes nga Mjekësia ligjore dhe dërgohet për autopsi.
Ndryshe, përfaqësues i Kosovës në basketboll, Gazmend Sinani ka vdekur sot si pasojë e një aksidenti rrugor që ka ndodhur në Gjakovë. Gazmend Sinani ishte 27 vjeçar. Pasi kaloi grupmoshat e reja në Prishtinë, karrierën e vazhdoi në Turqi, ku ishte pjesë e akademisë së Fenerbahçes dhe kombëtareve turke të grupmoshave të reja.
Në Kosovë ka luajtur për Prishtinën, Bashkimin e Rahovecin, kurse në klube të ndryshme turke është paraqitur disa sezone. Më 2017/18 luajti në ligën elite në Angli. Sinani ishte anëtar i kombëtares së Kosovës, që nga pranimi i FBK-së në FIBA.
https://kallxo.com/vijne-reagimet-per-vdekjen-e-basketbollistit-27-vjecar-gazmend-sinani/
https://kallxo.com/basketbollisti-gazmend-sinani-vdes-ne-nje-aksident/
