Ministri i Qeverisë Haradinaj kujtohet për taksën ujore
U.d. ministri i Mjedisit dhe Planifikimit Hapësinor, Fatmir Matoshi, ka nënshkruar memorandume të bashkëpunimit me 9 kompanitë rajonale të ujësjellësit, për pagesën e taksës ujore që për 10 vite kanë mbetur pa e paguar.
Qëllimi i këtyre marrëveshjeve është programimi dhe shlyerja e borxhit të akumuluar prej vitit 2007–2017 nga kompanitë.
Sipas ushtruesit të detyrës së MMPH-së, Fatmir Matoshi, këto marrëveshje do të mundësojnë që qytetarët të gëzojnë një nga të drejtat elementare, atë të qasjes në ujë të pijshëm.
“Si MMPH jemi të interesuar që të gjithë ata që shfrytëzojnë burimet ujore të përmbushin obligimet e tyre ligjore, por njëkohësisht jemi për t’iu ndihmuar atyre që të zhvillojnë kapacitetet e tyre për shtrirje të rrjetit dhe mirëmbajtjes. Andaj kjo marrëveshje në mënyrën siç është bërë nuk i dëmton këto kompani dhe njëkohësisht mundëson zbatimin e udhëzimit administrativ mbi taksen ujore që duhet të paguajnë KRU-të”, ka thënë Matoshi.
Matoshi ka thënë se KRU-të në afat prej 5 viteve do të paguajnë borxhin që kanë ndaj MMPH-së prej mbi 1.5 milion euro.
“Sipas këtyre marrëveshjeve që kemi bërë Kompanitë rajonale të Ujësjellësit (KRU) në aftat prej 5 vitesh do të paguajnë borxhin që kanë ndaj MMPH-së prej 1.585.654.370 euro duke filluar në muajin shtator 2018 me 20 për qind për të vazhduar edhe katër vite të tjera, me nga 20 për qind të pagesës”, tha ushtruesi i detyrës së MMPH-së.
Ilir Abdullahu, kryeshef i kompanisë rajonale ‘Prishtina’ ka thënë se arsye e mos pagesës se borxhit afro gjysmë milioni ndaj MMPH-së ka qenë mobilizimi me investime të mëdha.
“Pse nuk është paguar deri më tani është se ka pasur rrethana të ndryshme me kompanitë e viteve më parë, që kanë qenë në mobilizim me investime të mëdha dhe kështu që kjo taksë është e mirë që po paguhet. E kaluara do të jetë një histori dhe nuk do të përsëritet. Ne si kompani e Prishtinës kemi afër gjysmë milion, dhe do të fillojmë ta paguajmë me këste”, ka thënë ai.
KALLXO.com ka raportuar më parë në lidhje me dështimin e Ministrisë së Ambientit në inkasimin e taksës ujore, duke përfshire edhe kompanitë të cilat ishin pajisur me leje ujore nga MMPH.
Kujtojmë se një nga vendimet e para të kryeministrit Ramush Haradinaj ishte ai për faljen e miliona euro borxhe për kompanitë ambalazhuese të cilat shfrytëzojnë resurset ujore.
Pas reagimeve dhe paralajmërimeve se ky vendim do dërgohej në Kushtetuese, qeveria ishte tërhequr nga vendimi për faljen e mbi 50 milionë eurove të takës ujore për kompanitë ambalazhuese. https://kallxo.com/kerkohet-hetim-per-faljen-e-kunderligjshme-te-borxheve/
Emisioni “Drejtësia në Kosovë”, kishte transmetuar një hulumtim i cili tregonte se si në mënyrë të organizuar kompanitë publike dhe privatë po refuzonin ta paguanin taksën ujore.
Po ashtu “Drejtësia në Kosovë”, transmetoi faktet se si kishte dështuar Departamenti Ujorë në Ministri të Ambientit që të inkasonte taksën ujore nga kompanitë që kishin leje ujore dhe nga ato që shfrytëzonin ujin pa leje përkatëse.
https://kallxo.com/kush-perfiton-nga-falja-e-borxheve-per-shfrytezuesit-e-ujit/
https://kallxo.com/gjnk/te-organizuar-hapur-kunder-shtetit/
https://kallxo.com/dnk/avullohen-taksat-ujore/
https://kallxo.com/dnk/avullohen-taksat-ujore-1/
https://kallxo.com/jeta-ne-kosove-diskutoi-per-borxhin-e-takses-se-ujit/
https://kallxo.com/jnk/borxhi-per-ujin-1/
https://kallxo.com/ujesjellesit-kunder-ligjit-refuzojne-pagesen-e-takses-ujore/
https://kallxo.com/shteti-demton-buxhetin-e-vet-nuk-e-mbledh-taksen-ujore/
