Miliona për rrugët e Skenderajt, Drenasit dhe Malishevës

Ministri i Infrastrukturës dhe Transportit, Pal Lekaj, ka nënshkruar marrëveshje bashkëpunimi me komunën e Skenderajt, Drenasit dhe Malishevës.

Komuna e Skenderajt, përfiton mjetet financiare në vlerë 1.560.000 euro për këtë vit, për realizimin e tetë projekteve të infrastrukturës lokale.

Komuna e Drenasit, përfiton mbështetje në financim të tri projekteve, në vlerë prej 450.000 euro.

Kurse Komuna e Malishevës për vitin 2019 përfiton përkrahje financiare nga MIT-ja për dy projekte në vlerë prej 200.000 euro.

“Ministri Lekaj i siguroi kryetarët e komunave nënshkruese se mbështetja që ata po marrin këtë vit është vazhdimësi e mbështetjes nga viti i kaluar, kurse planifikimet buxhetore për këto projekte janë bërë edhe për dy vitet në vijim. Ai kërkoi nga ta angazhim serioz në realizimin e projekteve sepse vetëm kështu mund të përmbushet obligimi i tyre para qytetarëve që ata i drejtojnë”, ka shkruar MIT.

Krerët komunal të Skenderajt, Drenasit dhe Malishevës, duke e falënderuar ministrin Lekaj për këtë mbështetje të nevojshme për komunat, dhanë zotimet e tyre se këto projekte do të realizohen sipas kritereve më të larta dhe konform afateve të parapara me plane dinamike.