Mbyllen Strehimoret, Viktimat e Dhunës Mbesin në Rrugë

Qendrat që ofrojnë strehim për gratë dhe fëmijët të cilët kanë qenë viktima të dhunës në familje janë jashtë funksionit për momentin.

Bëhet e ditur se këto qendra do të jenë jashtë funksionit për muajt janar dhe shkurt për shkak të mungesës së mbështetjes financiare.

KALLXO.com ka kontaktuar me drejtoreshën e strehimores në Gjilan, Nazife Jonuzin, e cila konfirmoi se momentalisht strehimoret janë jashtë funksionit në mungesë të buxhetit.

“Nuk jam për momentin në Kosovë, mirëpo për momentin punëtoret nuk janë duke punuar në mungesë të mjeteve, përkrahjes financiare”, deklaroi drejtoresha e Strehimores në Gjilan.

Por Ministri i Punës dhe Mirëqenies Sociale, Skënder Reçica, tha për KALLXO.com të mos jetë në dijeni për daljen e këtyre qendrave jashtë funksionit, sado që e pranoi se ka pasur vështirësi në alokimin e buxhetit për to.

“Unë nuk kam një informacion që ato janë të mbyllura, nuk e di nëse ka diçka tillë. Është fakt që është një vonesë në buxhet të tyre, akoma nuk ju kanë alokuar mjetet për shkak të buxhetit për vitin 2018, por nuk është se qendrat nuk janë duke funksionuar. Të paktën unë nuk e kam një informacion të tillë”, tha ministri Reçica.