Mbi 400 mijë hektarë shfrytëzohen si tokë bujqësore në Kosovë

Janë mbi 400 mijë hektarë tokë bujqësore që shfrytëzohet në Kosovë. Më shumë se gjysma e tyre është me livadhe e kullosa ndërsa nga arat dominojnë drithërat.

Këto të dhëna u bënë të ditura nga rezultatet e Anketës së Ekonomive Bujqësore për 2017-ën nga Agjencia e Statistikave të Kosovës (ASK)

Mbi 400 mijë hektarë tokë shfrytëzohet si tokë bujqësore  ku pjesa më e madhe janë kullosa dhe livadhe

“Rezultatet e kësaj ankete tregojnë se në Kosovë sipërfaqja e shfrytëzuar e tokës bujqësore është 416 072.33 hektarë (përfshirë tokën e përbashkët). Nga gjithsej sipërfaqja e shfrytëzuar e tokës bujqësore, pjesa më e madhe u përket: livadheve dhe kullosave (përfshirë tokën e përbashkët) me 52.5%; si dhe tokës së punueshme, ku arat marrin pjesë me 44.9 %, kulturat shumëvjeçare (pemët, vreshtat, fidanet) 2.3%, dhe kopshtet me 0.3%.” thuhet në komunikatë

Pjesa më e madhe e tokave të punueshme apo arave janë me drithëra

“Nga gjithsej tokë e punueshme – ara (186 954.16 ha), pjesa më e madhe është me drithëra 120 746.28 ha (64.6 %); bimë foragjere me 35 998.79 ha (19.3%); perime gjithsej (në fushë të hapur, në serra dhe kopshte) janë 9 698.75 ha, prej të cilave perime në fushë të hapur dhe serra janë 8 499.76 ha (4.5%); patate 4 290.29 ha (2.3%); bishtajore 3 559.50 ha (1.9%); bimë industriale 450.45 ha (0.2%); kultura të tjera 2 333.11 ha (1.2%) dhe tokë djerrinë 11 075.99 ha (5.9 %).”, bën të ditur komunikata

Sipas ASK-së, sipërfaqe e ujitur, të paktën një herë gjatë periudhës referuese të anketës, është 32 294.10 hektarë. Kurse, gjithsej sipërfaqja e trajtuar me pesticide është 115 543.24 hektarë.

Sipas rezultateve të AEB 2017, numri i gjedheve është 259 729 krerë; i deleve është 182 278 krerë; i dhive është 28 410 krerë; i derrave është 41 086 krerë; i njëthundrakëve (kuaj, mushka, gomarë) është 2 326 krerë; i shpezëve (pula, qura, rosa dhe pata) është 2 811 385 krerë; dhe gjithsej numri i koshereve të bletëve është 163 717.