Aleksandër Lumezi, Kryeprokuror i Shtetit. Foto: Kallxo.com

Lumezi: Për rastin e gylenistëve u njoftova nga Ambasada amerikane

Kryeprokurori i Shtetit, Aleksandër Lumezi, ka thënë  se Prokuroria e Shtetit është duke e hetuar rastin e dëbimit të 6 shtetasve turq drejt Turqisë në atë që njihet si rasti i gylenistëve.

Në një intervistë për emisionin “n’Shesh” te RTK, ai ka theksuar se hetimet kanë filluar para se të formohet Komisioni parlamentar për këtë rast.

“Ne deri më tani i kemi shqyrtuar edhe këto 32 shkeljet që i ka gjetur Komisioni i Kuvendit, por kemi ndërmarrë edhe veprime konkretet hetimore. I kemi dëgjuar disa dëshmitarë, i kemi dëgjuar edhe disa të dyshuar që vijnë nga institucionet e sigurisë por kemi marrë edhe incizime të cilat janë bërë gjatë deportimit të 6 shtetasve turq. Kemi kërkuar nga AKI të na japin edhe informacione të tjera lidhur me vlerësimin se personat në fjalë e kanë rrezikuar sigurinë kombëtare në Kosovë”, ka thënë Lumezi.

Ai e ka pranuar faktin se si Kryeprokuror i Shtetit nuk ka qenë i informuar për rastin dhe se informacionin e parë e ka marrë nga Ambasada amerikane.

“Jo unë nuk kam qenë i informuar gjatë këtij aksioni. Informacionin e parë e kam marrë nga Ambasada amerikane të cilët më kanë thirrur ne telefon dhe kanë kërkuar sqarime se kush i ka dëbuar gylenistët nga Republika e Kosovës. Si Kryeprokuror i Shtetit nuk kam pasur asnjë informacion lidhur me procedurat për dëbimin e gylenistëve nga Republika e Kosovës”, shtoi ai.

Sipas tij në këtë rast janë shkelur të drejtat e shtetasve turq pasi autoritetet vendosën dëbimin pa u shqyrtuar ankesat e tyre nga organet gjyqësore./RTK