Vazhdon edhe për 10 ditë afati i konkursit për zyrtarë policorë

Policia e Kosovës ka bërë të ditur se e ka vazhduar edhe për 10 ditë afatin e konkursit të hapur për zyrtarë policorë.

Sipas PK-së, kjo është bërë në bazë të Ligjit për Policinë, Ligjit për Barazi Gjinore, Ligjit për Mbrojtjen nga Diskriminimi, Udhëzimin Administrativ mbi Marrëdhënien e Punës në Policinë e Kosovës, dhe vendimin e Drejtorit të Përgjithshëm.

Në njoftim thuhet se afati për paraqitjen e aplikacioneve vazhdohet edhe për 10 ditë duke filluar nga data 7 nëntor 2021 deri me datë 26 nëntor 2021, me qëllim të ofrimit të mundësisë edhe më të gjatë kohore për aplikim, “si dhe të ju mundësohet aplikimi online në stacionet policore edhe kandidatëve të cilët kanë vështirësi për aplikim online (ju mungojnë pajisjet për aplikim si dhe nuk kanë qasje në internet).

“Sqarim: Pra kandidatët të cilët kanë vështirësi për aplikim online (ju mungojnë pajisjet për aplikim si dhe nuk kanë qasje në internet) mund të drejtohen në stacionin policor më të afërt për të bërë aplikimin online”, njofton Policia.

“Vëmendje: Kriteret në konkurs mbeten të njëjta si dhe kandidatët të cilët kanë konkurruar në këtë konkurs nuk është e nevojshme të aplikojnë përsëri. Kandidatët të cilët kanë bërë gabim gjatë aplikimit apo bashkëngjitjes së dokumenteve kanë të drejtën që të adresojnë kërkesë në email adresën [email protected] lidhur me problemin e tyre”, theksohet tutje.