Shtyhet shpallja e aktgjykimit për të akuzuarin Nijazi Kryeziu

Në Gjykatën e Prizrenit, sot është shtyrë shpallja ndaj të akuzuarit Nijazi Kryeziu i akuzuar për keqpërdorim të detyrës zyrtare.

Kryeziu, po akuzohet nga prokuroria se ka lidhur kontratë pa tender në kohën sa punonte në Komunë.

Dëmi i shkaktuar me lidhjen e kësaj kontrate vlerësohet të jetë 7 mijë e 200 euro.

Seanca për shpalljen e aktgjykimit ndaj ish drejtorit të administratës, ishte paraparë që të mbahej sot në ora 14:00.

Mirëpo, gjykata erdhi në përfundim se edhe një herë duhet të hapet shqyrtimi kryesor për plotësimin e procedurës së provave.

Kryetarja e trupit gjykues Raima Elezi, konstatoi se në aktakuzë si provë nga prokuroria ishte propozuar që të lexohet raporti i Auditimit për pasqyrat financiare të Komunës së Prizrenit të vitit 2015, mirëpo ky dokument nuk i ishte bashkangjitur shkresave të lëndës.

Lidhur me këtë rast, përfaqësuesi i prokurorisë Mehdi Sefa, u obligua që në afatin ligjor prej 3 ditësh ta dorëzojë raportin e lartpërmendur.

Tutje seanca vazhdoi me administrimin e provave.

Prokurori Sefa, gjithashtu i propozoi gjykatës që të lexohet urdhri për obligimin e pagesës së nënshkruar nga Bashkim Lubovci, Nijazi Kryeziu dhe Shpresa Vula në shumën prej 1,200 euro si dhe vendimi i nënshkruar nga ana e ish kryetarit të komunës Ramadan Muja.

Pas leximit të provave palët mbetën në tërësi pranë fjalës përfundimtare nga seancat e kaluara.

Shqyrtimi i sotëm përfundoi, kurse shpallja u caktua për datën 21 shtator 2021.

Njazi Kryeziu po akuzohet për periudhën kohore janar – dhjetor të vitit 2015, kur ishte drejtor i Urbanizmit në Prizren nën udhëheqjen e ish kryetarit Ramadan Muja.

Prokuroria e akuzon Kryeziun se pa hapur ndonjë procedurë tenderuese ka lidhur kontratë me TV Opinion për emitimin e spoteve reklamuese për sensibilizimin e opinionit publik për legalizimin e objekteve të ndërtuara pa leje për nevojat e Drejtorisë së Urbanizmit me të cilën ka udhëhequr.

Dëmi i shkaktuar me lidhjen e kësaj kontrate cilësohet të jetë në total prej 7 mijë e 200 euro, për periudhën 1 Janar deri më 31 Dhjetor të vitit 2015, në vlerë prej 600 euro në muaj.

Raportet e KALLXO.com lidhur me këtë rast mund t’i gjeni në këtë – LINK