Rasti 'Syri i Popullit', dëshmitari rrëfen momentin kur një person ia kishte kërkuar babait të tij numrin e Azem Vllasit

 

Në seancën e mbajtur në rastin e njohur si “Syri i Popullit”, kanë dëshmuar dëshmitarët, Hekuran Mavriqi, i biri i Ramiz Mavriqit tashmë të ndjerë dhe dëshmitari Berat Rustolli.

Dëshmitari Hekuran Mavriqi, tha se mbetet në tërësi prapa deklarimeve të dhëna në Polici dhe Prokurori.

“Kemi qenë në veturë bashkë me prindin, në numrin e dytë që e përdorte babi për familjarë dhe internet, babin e thërret një person i panjohur duke i thënë, “po më duhet numri i Azem Vllasit për një tokë” dhe neve na u ka dukë e çuditshme, pasi mund ta gjesh lehtë në Google numrin e Azem Vllasit”, tha dëshmitari Mavriqi.

“Babi i tha, “në rregull flas me avokatin dhe ju lajmëroj”, s’më kujtohet saktë kur e ka thirrë babi Azem Vllasin, por e di se babi e ka thirrë Azem Vllasin dhe i ka tregu se një palë po e kërkon atë”, shtoi dëshmitari Mavriqi.

Ndërsa dëshmitari i dytë, Berat Rustolli që është nip i Avni Llumnicës, tha se e ka takuar dajën e tij më datën 17 mars 2017.

“Jemi takuar me dajën më 17 mars 2017, ku e kam ftuar për të pirë kafe në lokalin tim dhe e kam vizituar në burg, sa herë që kam pasur mundësi”, tha ai.

Ndërsa Avni Llumnica, reagoi duke thënë se po tentojnë t’i përçajnë.

“Këta dojnë me na përça neve”, tha Llumnica.

Prokurori i rastit, Burim Çerkini tha se, dëshmitarët Nuhi Zeka dhe Gëzim Haliti nuk janë në Kosovë, dhe në shqyrtime të kaluara, deklarata e Nuhi Zekës është lexuar me vendim të trupit gjykues të atëhershëm.

“Kërkojmë që të mos zgjatet ky proces, dëshmitë e këtyre të konsiderohen të lexuara. Për Nijazi Sinanin është mirë që të sillet këtu, kurse për Faton Topallin, të lexohet dëshmia e tij”, tha prokurori.

Mbrojtja e të akuzuarit, Naim Rudari tha se qëndrojnë dhe më tutje pranë kundërshtimit që në këtë proces gjyqësor të dëgjohen si dëshmitarë Nuhi Zeka dhe Gëzim Haliti, pasi sipas tij është jorelevante dhe shihet se Prokuroria s’ka ku ta mbështesë aktakuzën ndaj Avni Llumnicës.

“Përderisa ata janë gjallë dhe mund të gjenden, ligji nuk parasheh që deklaratat e tyre të lexohen. Prokuroria të sjellë në Gjykatë dëshmitarët, përpos dëshmitarit Ramiz Mavriqi tashmë të ndjerë”, theksoi avokati Rudari.

Ndërsa mbrojtja e të akuzuarit Sadri Ramabaja, Ramiz Krasniqi tha se duhet të ftohen dëshmitarët.

“Dëshmitarët të ftohen, në të kundërtën ekziston një mundësi që Prokuroria të heqë dorë nga dëgjimi i këtyre dëshmitarëve”, tha avokati Krasniqi.

Avokati Rudari kërkoi nga trupi gjykues që të ndërpresë masën e paraburgimit ndaj Avni Llumnicës, pasi sipas tij nuk ekzistojnë kushtet dhe rrethanat për të qëndruar në paraburgim.

I njëjti kërkoi që, Avni Llumnicës t’i zëvendësohet masa e paraburgimit me dorëzani.

“Kemi argumente me shkrim se autoritetet zvicerane kanë kërkuar që ky të paraqitet në Zvicër, para datës 7 mars 2021, e nëse nuk paraqitet deri në këtë datë, më datë 8 mars 2021, Zyra për Emigracion ka shkruar se do ia shfuqizojë leje qëndrimin në Zvicër, kemi sjellë në Gjykatë këto prova me zëvendësim të paraburgimit me masë të dorëzanisë. Pas 8 marsit 2021, gruaja e Llumnicës akoma nuk ka pranuar vendimin përfundimtar të shfuqizimit të leje qëndrimit të Llumnicës në Zvicër, ajo ka shfrytëzuar mundësinë e ankimimit atje përmes avokatit dhe ende nuk ka pranuar përgjigjen përfundimtare”, theksoi avokati Rudari.

Kurse Avni Llumnica, premtoi se do i përgjigjet Gjykatës në këtë rast.

“Premtoj që do i përgjigjem Gjykatës në këtë rast, nëse është dikush që i intereson me zgjidhë rastin jam unë”, deklaroi Llumnica.

Kurse Prokurori tha se në këtë fazë të procedurës, kundërshtojnë propozimin e avokatit.

“Mendojmë se ende ka bazë që Avniu të qëndrojë nën masën e paraburgimit, pa dashtë që të nxjerrim përfundime për epilogun e kësaj çështje”, theksoi prokurori Çerkini.

Ndërsa i dëmtuari Vllasi, e mbështeti propozimin e prokurorit.

Trupi gjykues mori aktvendim sa i përket dëshmitarëve që s’kanë mundur të sigurohen deri më tani, që të lëshohet urdhëresë për verifikim të vendbanimeve dhe vendqëndrimeve të tyre.

Ndërsa sa i përket propozimit të mbrojtjes së Avni Llumnicës, për zëvendësim të paraburgimit me dorëzani, për të njëjtin do të vendoset jashtë seancës gjyqësore, pas vlerësimit të rrethanave.

Seanca e radhës u caktua për datën 24 maj 2021.

Kujtojmë se Gjykata e shkallës së parë në Prishtinë më 21 janar 2019, kishte marrë vendim dënues ndaj të akuzuarve të organizatës të ashtuquajtur “Syri i Popullit”.

Gjykata kishte dënuar Avni Llumnicën me 12 vjet burgim unik për veprat penale të hakmarrjes, sulmit seksual dhe terrorizmit, si dhe i konfiskoi veturën e markës “BMW X6”.

Për terrorizëm ishte dënuar edhe Sadri Ramabaja me 5 vjet burgim, Ragip Sallova 4 vjet, Rexhep Topllana me 2 vjet burgim dhe Halim Halimi ishte dënuar me 3 vjet burgim.

Ndërsa Bajrush Konjusha ishte dënuar me 3 vjet burgim efektiv si dhe dënim me gjobë në shumë prej 300 euro për armëmbajtje pa leje të një pushke ajrore dhe një revole me gaz e modifikuar.

Behxhet Luzha ishte dënuar me 2 vjet burgim për shkak të moslajmërimit të veprës penale.

Ndërsa, tashmë të ndjerit, Murat Jashari, iu kishte shqiptuar masa e trajtimit të detyrueshëm psikiatrik në kohëzgjatje prej 10 viteve si dhe iu konfiskua arma e llojit “Crvena Zastava” me shurdhues. Jashari ka vdekur ditë më parë.

Në aktgjykimin 117 faqesh të 3 marsit 2020 të Gjykatës së shkallës së parë të shkruar nga kryetarja e trupit gjykues Naime Krasniqi – Jashanica, Apeli gjeti 11 shkelje të ligjit që si pasojë pati prishjen e vendimit dhe kthimin e lëndës në rigjykim.

Po ashtu Apeli vendosi që të akuzuarin Sadri Ramabaja ta lirojë nga paraburgimi.

Apeli ka gjetur 11 shkelje esenciale që kanë të bëjnë me mbajtjen e seancës gjyqësore pa praninë e të akuzuarit, përjashtimi i publikut pa aktvendim të arsyetuar, mungesën e propozimit të të dëmtuarve për ndjekje, gjykimin e rastit duke tejkaluar akuzën, mos-përpilimin e aktgjykimit konform ligjit, shkeljen e mbrojtjes, shkeljen e ligjit penal, mosarritjen e vërtetimit të veprës penale, vërtetimin e gabuar dhe jo të plotë të gjendjes faktike, si dhe mbajtjen e gjykimit ndaj personit i cili nuk është në gjendje shëndetësore mendore për përballimin e gjykimit.

Në aktakuzën e dytë të Prokurorisë thuhet se ndaj Murat Jasharit, tani të ndjerë, ishte ndarë procedura, dhe paraqitur propozimi për trajtim të detyrueshëm psikiatrik.

Jasharit më 9 shkurt 2021 i është shqiptuar masa e trajtimit të detyrueshëm psikiatrik me ndalim në Institutin e Psikiatrisë Forenzike në Prishtinë. Ndërsa më 3 mars 2021, Murat Jashari ka vdekur.

Kurse për të akuzuarit Ragip Sallova, Rexhep Topllana, Halim Halimi dhe Behxhet Luzha, Prokuroria është tërhequr nga ndjekja penale, duke i zbatuar rekomandimet e vendimit të Apelit.

Sipas aktakuzës së Prokurorisë Speciale, Avni Llumnica më 13.03.2017, në Prishtinë, në bashkëkryerje me ish të pandehurin tashmë të ndjerin Murat Jashari, e që ky i fundit ka tentuar ta privojë nga jeta tani të dëmtuarin Azem Vllasi nga hakmarrja e paskrupullt dhe për shkak të motiveve të ulëta, si ish funksionar i Kosovës i viteve të tetëdhjeta, që është konsideruar tradhtar i vendit, i pandehuri Avni Llumnica me dashje ka kontribuar thellësisht në kryerjen e veprës penale duke e ndihmuar tashmë të ndjerin ish të pandehurin Jashari, në atë mënyrë që më 06.03.2017 me automjetin e tij të markës BMË X6, me targa të Zvicrës e kanë sjell nga Zvicra në Kosovë.

Aktakuza tregon se më 10.03.2017 e ka ftuar si mysafir në shtëpinë e tij në fshatin Barilevë, me ç’rast ish i pandehuri Jashari ka fjetur në shtëpinë e tij, e të nesërmen më 11.03.2017 gjatë ditës kanë qenë së bashku në villa “Panorama” në fshatin Matiqan edhe me të pandehurin Sadri Ramabaja, në mbrëmje e kanë dërguar në motel “Fontana” në Veternik, ku edhe ia ka paguar fjetjen për atë natë.

Ndërsa sipas aktakuzës, më 13.03.2017, pasi ish i pandehuri Murat Jashari ka tentuar që ta privojë nga jeta tani të dëmtuarin Azem Vllasi e që për pasojë i shkakton lëndime të rënda trupore, i pandehuri Avni Llumnica, menjëherë pas aktit është takuar në qytet, janë fotografuar dhe me automjetin e tij BMW X6, me targa zvicerane kanë shkuar në motel “Fontana” për t’i marrë gjërat personale tani të të ndjerit e ish të pandehurit Murat Jashari dhe të nisen në drejtim të Maqedonisë me qëllim që të ikin nga vendi i kryerjes së veprës penale saktësisht nga Kosova dhe për të shkuar në Zvicër. Mirëpo rreth orës 12:00, së bashku me ish të pandehurin Murat Jashari janë arrestuar nga Policia e Kosovës.

Me këtë në bashkëkryerje kanë konsumuar veprën penale – vrasje e rëndë e mbetur në tentativë.

Në aktakuzë thuhet se Sadri Ramabaja me dashje që Jashari të vriste tani të dëmtuarin Azem Vllasi, i ka dhënë ndihmë në kryerjen e veprës penale në atë mënyrë që më 11.03.2017 gjatë ditës së bashku me të ish të pandehurin Murat Jashari dhe të pandehurin Avni Llumnica kanë qenë në vila “Panorama” në Matiqan, ku në të njëjtin vend duke qenë në dijeni se po të ndodh kryerja e veprës penale, i kanë dhënë këshillat dhe udhëzimet se si të kryhet vepra penale, se si të bie në kontakt me tani të dëmtuarin dhe çka të veprohet pas kryerjes së veprës penale dhe pas takimit së bashku me të pandehurin Avni Llumnica në mbrëmje e kanë dërguar në motel “Fontana” në Veternik.

Pastaj thuhet se, ditën e nesërme me datën 13.03.2017 ish i pandehuri Murat Jashari duke vepruar sipas udhëzimeve ka tentuar që ta privojë nga jeta tani të dëmtuarin Azem Vllasi e që për pasojë shkakton lëndime të rënda trupore, ku pas kryerjes së veprës penale largohet nga Kosova, fillimisht në Shqipëri dhe gjatë tentimit të largohet nga Shqipëria, arrestohet nga Policia shqiptare, me pretekstin se ka dashur të kalojë kufirin me dokumente të falsifikuara.

Kurse tutje thuhet se, të pandehurit Bajrush Konjusha me rastin e bastisjes së shtëpisë së tij më 25.05.2017, i është konfiskuar një pistoletë e gazit “Voltran Mini” me gaz, këtë armë e ka blerë në Gjermani dhe e ka sjellë në Kosovë respektivisht e ka ndryshuar dhe e ka bërë funksionale për fishekë të armës të cilën e kishte pasur në posedim pa lejen e organit kompetent. Gjithashtu në shtëpinë e tij është gjetur dhe konfiskuar edhe një pushkë ajrore me diabolla 250 copë (municion i pushkës ajrore), të cilat i pandehuri i ka poseduar pa lejen e organit kompetent, thuhet në aktakuzë.

Më këtë akuzohet se ka kryer veprën penale – mbajtje në pronësi, kontroll se posedim të paautorizuar të armëve.

Kujtojmë se kjo aktakuzë ishte konfirmuar.

 

Azem Vllasi dëshmoi në gjykimin e të akuzuarve për tentim vrasjen e tij