Rasti ‘Gylenistëve’, ish-kreu i AKI-së pritet të ulet sot në bankën e të akuzuarit
Ish-shefi i AKI-së, Driton Gashi dhe drejtori i Departamentit të Shtetësisë dhe Azilit, Valon Krasniqi, së bashku me drejtorin e Migracionit, Rrahman Syljemanin, priten që sot për herë të parë të përballen me akuzat e Prokurorisë Speciale për deportimin e gjashtë shtetasve turq të njohur si rasti i ‘gylenistëve’.
Sipas aktakuzës së Prokurorisë Speciale, të tre zyrtarët akuzohen për keqpërdorim të pozitës apo autoritetit zyrtar dhe privim të kundërligjshëm të lirisë.
Në këtë shqyrtim fillestar pritet që të lexohen për herë të parë akuzat ndaj tyre, dhe të njëjtit të deklarohen në lidhje me fajësinë.
Akuzat ndaj tyre kanë të bëjnë me deportimin e gjashtë shtetasve turq në Turqi.
Në mëngjesin e 29 marsit 2018, në rrethana krejtësisht misterioze Cihan Ozkan, Kahraman Demirez, Hasan Husein Gunakan, Mustafa Erdem, Osman Karakaya dhe Jusuf Karabina u arrestuan e më pas u deportuan për në Turqi.
Arrestimi i gjashtë shtetasve turq u bë nga institucionet e Kosovës, ndërsa operacioni për deportimin e tyre, nga ekspertët e fushës u vlerësua se u përcoll me një “mal shkeljesh ligjore”.
Vetëm pasi që Hasan Hysein Gunakan u deportua në Turqi, u kuptua se kishte ndodhur një gabim dhe se i njëjti ishte deportuar gabimisht në vend të Hasan Hysein Demir.
Ndonëse i deportuar gabimisht, më 28 janar të vitit 2020, sipas raportimeve të mediave turke, Gunakan u dënua me mbi 8 vite burgim nga Gjykata në Stamboll.
KALLXO.com ka provuar të kontaktojë edhe me ish-shefin e AKI-së, por i njëjti nuk ka qenë i qasshëm deri në momentin e publikimit të këtij artikulli.
Prokuroria pretendon se të pandehurit Driton Gashi dhe Valon Krasniqi dhe i pandehuri Rrahman Sylejmani dyshohen se kanë kryer veprën penale “Keqpërdorimi i pozitës apo autoritetit zyrtar.
Gashtë shtetasit turq janë të akuzuar për lidhje e tyre me Fetullah Gylen, njeriun për të cilin presidenti turk Recep Tayyip Erdogan thotë se qëndron pas grusht shtetit të dështuar të vitit 2016.
Për këtë operacioni AKI sipas ekspertit amerikan, kishte ‘pushtuar’ zyrat e Policisë së Kosovës, e cila po ashtu përbënte shkelje, sepse sipas legjislacionit në Kosovë, AKI nuk ka kompetenca të organizojë operacione.
Arsyetimi i Agjencisë Kosovare për Inteligjencë(AKI), në lidhje me dëbimin e gjashtë shtetasve turq ishte se ata paraqesin ‘rrezik për sigurinë kombëtare’.
Madje për këtë rast ishte raportuar edhe nga një grup punues i OKB-së të cilët depërtimin e shtetasve turq e kishin konsideruar me shkelje flagrante e të drejtave të njeriut.
Kosova ‘përballë drejtësisë’ për deportimin e gjashtë shtetasve turq
