Prokuroria: Tekniku i Pylltarisë lejoi shitjen e qymyrit në treg
Muharrem Basha, teknik i pylltarisë në Drejtorisë për Bujqësi në komunën e Suharekës, i akuzuar për lejimin e transportit të thëngjillit në treg, përmes avokatit të tij ka dhënë fjalën e tij përfundimtare.
Prokuroria e Prizrenit, po pretendon se Basha kreu vepër penale duke e pajisur më 13 korrik 2018 një qytetar me fletë-përcjellje, duke i mundësuar atij transportin e papenguar të thëngjillit të dedikuar për treg.
Sipas aktakuzës së përpiluar nga prokurorja Ervehe Gashi, Muharrem Basha, në cilësi të personit zyrtar ka shfrytëzuar detyrën e tij zyrtare dhe i ka tejkaluar kompetencat e tij dhe ka pasur qëllim që dikush tjetër të përfitojë çfarëdo dobie pasurore.
Prokuroria po konsideron se i pandehuri Basha me dashje ka shkelur ligjin lidhur me detyrat e tij, duke vepruar në kundërshtim me Udhëzimin Administrativ të Ministrisë së Bujqësisë.
Gjithashtu, i njëjti, sipas Prokurorisë, ka shkelur edhe Ligjin për Pyjet të Kosovës.
Mbrojtësi i të akuzuarit Muharrem Basha, avokati Pjetër Përgjokaj, i kërkoi gjykatës që klienti i tij të lirohet nga akuza.
Edhe i akuzuari, Muharrem Basha, gjykatësit Artan Sejrani, i dha një fjalë përfundimtare të tij të shkruar.
Ndërsa, prokurorja Ervehe Gashi, kërkoi nga gjykata që i njëjti të dënohet sipas ligjit, me arsyetimin se në veprimet e tija ka ekzistuar dëshira e përfitimit.
Shpallja e aktgjykimit do të bëhet ditën e hënë, me datën 24 shkurt.
Tekniku i pylltarisë në Drejtorisë për Bujqësi në komunën e Suharekës, Muharrem Basha, kishte dalë para Gjykatës së Prizrenit për t’u përgjigjur për akuzën për keqpërdorim të detyrës zyrtare, ku edhe ishte deklaruar i pafajshëm.
