Vrasja në Shtime, Policia bastis disa lokacione në Prishtinë
Policia e Kosovë ka bastisur disa lokacione në Prishtinë lidhur me rastin e grabitjes së shtëpisë së mërgimtarit nga Shtimja, i cili mbeti plagosur dhe një person i dyshuar për grabitje mbeti i vrarë.
KALLXO.com merr vesh se bastisjet është duke i udhëhequr Prokuroria e Ferizajt.
Deri më tani siç merr vesh KALLXO.com në bastisjet e kryera deri më tani në Prishtinë, Policia nuk ka gjetur asgjë të dyshimtë e cila lidhet me rastin e grabitjes së mbrëmshme në Shtime.
KALLXO.com raportoi se personi i vrarë gjatë një grabitje mbrëmë në shtëpinë e mërgimtari në Shtime, siç merr vesh KALLXO.com është i biri i B. F., zyrtar në Policinë e Kosovës.
Këtë e ka konfirmuar për KALLXO.com edhe kryeprokurori i Ferizajt Shukri Jashari.
“B. F është baba i të vrarit, është polic në Graçanicë, është afër pensionit”, ka konfirmuar kryeprokurori i Ferizajt, Shukri.
Ai poashtu Ka konfirmuar se personi që ka mbetur i vrarë gjatë një grabitje në Shtime ishte i njohur për Policinë dhe Prokurorinë.
Ai kishte kryer 41 vepra penale, 90 për qind e të cilave kishin të bënin me lëndë narkotike.
Këtë e ka konfirmuar për Kallxo.com, kryeprokurori i Ferizajt, Shukri Jashari.
Në orët e para të mëngjesit të së mërkurës disa persona dyshohet se ia kishin mësyrë shtëpisë së një mërgimtari në Shtime për grabitje.
Njëri nga ta mbeti i vdekur, ndërsa të tjerët u arratisen.
I plagosur mbeti edhe pronari i shtëpisë. Ai u plagosë në këmbë dhe sipas familjarëve gjendja e tij është jashtë rrezikut për jetë.
Kallxo.com, mëson se grabitësi i cili ka vdekur është nga Prishtinës.
Lidhur me vdekjen e tij deri me tani është ndaluar Nuhi Nrecaj.
Gjatë ditës Prokuroria në Ferizaj ka dhënë detaje lidhur me vrasjen në Shtime.
Sipas njoftimit, ngjarja kishte ndodhur në ora 3:00 të mëngjesit në “Lagjen e Pajtimit” të qytezës së Shtimes, ku në atë rast ishte kryer edhe një grabitje.
“Sipas informatave të para që posedon Prokuroria, grabitësit janë konfrontuar me pronarin e shtëpisë dhe si pasojë e kanë plagosur pronarin e shtëpisë me armë zjarri, ndërsa, 300 metra larg shtëpisë, është gjetur trupi i pajetë i njërit nga grabitësit”, bëri të ditur Prokuroria e Ferizajt.
Me urdhër të prokurorit kujdestar janë ndaluar dy persona prej 48 orësh ndërsa trupi i pajetë i viktimës është dërguar në obduksion në Institutin e Mjekësisë Ligjore.
Ndryshe, Policia e Kosovës ka dhënë detaje rreth vrasjes në Shtime.
“Policia ka marrë një informatë rreth orës 03:20 për të shtëna me armë zjarri dhe ka dalë menjëherë në vend të ngjarjes. Raportohet se 3 ose 4 persona kanë tentuar ta grabisin një shtëpi”, tha Hajdini për KALLXO.com.
“Grabitësit e dyshuar kanë kërkuar nga pronari i shtëpisë që të dorëzohet por ai nuk ka pranuar. Më pas ata kanë gjuajtur me armë dhe e kanë plagosur në këmbë”, shtoi Hajdini.
“Identiteti i të vdekurit ende nuk dihet. Ai është dërguar në Institutin e Mjekësisë Ligjore për obduksion. Vrasja ka ndodhur me mjete të forta ndërsa dyshohet të jenë përdorur edhe mjete të mprehta sepse hetuesit kanë gjetur një thikë në vendin e ngjarjes”, tha zëdhënësi Hajdini.