Shirit i Policisë Foto: REL/AP

Paraburgim për të dyshuarit për vrasjen e djeshme afër Lipjanit

Gjykata e Prishtinës ka aprovuar  kërkesën e Prokurorisë për caktimin e paraburgimit ndaj dy të dyshuarve për vrasjen që ka ndodhur dje afër Lipjanit.

Paraburgimi prej një muaji është caktuar për A.S., i dyshuar për veprat  penale – vrasje e rëndë dhe armëmbajtje pa leje dhe B.S., i dyshuar për shtytje në kryerjen e  vrasjes së rëndë.

Gjykata njofton se Prokuroria po akuzon A.S. dhe B.S. se më 6 maj 2020, kanë privuar nga jeta të dëmtuarin A.S.,  i cili si pasojë e plagëve të marra ka vdekur në QKUK.

Rasti ka ndodhur dje afër ish-kompleksit tregtar QMI, në afërsi të Lipjanit, në rrugën Prishtinë-Ferizaj.

Sipas Gjykatës, caktimi i masës së paraburgimit  është masë adekuate për zhvillimin e papenguar të procedurës penale.

Po ashtu, Gjykata ka gjetur se nëse të pandehurit gjinden në liri ekziston rreziku se do të përsërisin veprën penale, do të ndikojnë në njëri-tjetrin si dhe do të arratisen për t’iu shmangur dënimit.

Sipas njoftimit të Gjykatës, të pandehurit janë udhëzuar në të drejtën e tyre për të paraqitur ankesë në Gjykatën e Apelit.

Do NOT follow this link or you will be banned from the site!